Ursin spazzachamin, scriveva el sez savens a la fin, sch'el trametteva in messadi. Quai mussa in zichel ch'el s'identifitgava fitg ferm cun sia professiun e sia lavur. Ina lavur che plascheva bain, oravant tut il contact cun la clientella. Dentant, la mancanza da persunal dal fatg, quella ha schon daditg fatg squitsch a l'impressari. Atgnamein quasi adina schon. Spazzachamins datti betg uschè blers. Perquai senteva Ursin Derungs questa mancanza forsa schon pli ditg che blers auters mastergners. Oz, è questa realitad arrivada quasi dapertut. El saja persvadì ch'en 5 onns, sappia entgina lavur manuala betg vegnir fatga pli pervia da mancanza da persunas qualifitgadas.
Il squitsch è adina daventà pli grond
Lavurar adina sut squitsch, adina cun currer suenter per dumagnar da far la lavur per l'atgna cuntentientscha, per quella da la clientella ed era da l'assicuranza d'edifizis, quai ha stressà Ursin Derungs talmain ch'el e stà fitg datiers d'in burnout. La dumonda, schebain chalar cun la fatschenta u betg, quella è stada preschenta durant onns. Enfin ch'el ha percurschì ch'el stoppia far ina midada.
Jau aveva pers mes umor ed jau era sco en in tunnel. Jau veseva be la lavur.
La decisiun da chalar cun sia fatschenta ha il Lumnezian prendì avant prest in onn. Chalà ha el lura definitivamain la stad vargada. Bleras spassegiadas ha el duvrà per vegnir ad ina via. Er oz, va el anc bler a spass per sa revegnir, il squitsch è dentant davent.
Dapi lura ha el prendì temp per sa revegnir. Lura ha el anc fatg l'examen da manischunz da bus pitschens. En lezza direcziun less el er ir professiunalmain.
Cun mai vai puspè bain, e quai è il principal.
