La professiun da mainascola è ina lavur da generalist. Dasper manar persunal ston las persunas che fan quella lavur er esser bunas en fatgs organisatorics. Conflicts cun la magistraglia e cun geniturs malcuntents appartegnan al mintgadi.
Il pensum da mainascola è ina bellezza clamada. La damaun cura ch'ins va a lavurar na san ins mai tge che succeda. En quella clamada ston ins avair gugent problems.
Midar la rolla po chaschunar conflicts
Ina situaziun che po magari manar tar conflicts tranter mainascola e scolasts u scolastas è la midada da rolla che sa dat sch'ina persuna or dal team surpiglia la rolla da manadra.
La midada da rolla è ina sfida tant per quel che fa ella sco era per ils «anteriurs collegas». Quai dovra temp e fidanza enfin ch'i funcziuna.
Il mainascola sto esser cun tuts scolasts e tuttas scolastas uschè gist sco pussaivel. Ins na po betg esser cun tuts tuttina, dentant ston ins sentir tge pussaivladads ch'ins ha da manar la glieud.
Il manaschi da scola è ils davos onns vegnì bler pli structurà. Quai ha per consequenza ch'i dat dapli reglaments, formulars e glistas. Uschia vegn il corset per ils magisters pli stretgs, dentant restia la libertad co dar scola anc adina fitg gronda.
Memia pauc temp
In fatg ch’engrevgescha il pensum da mainascola è tenor l'opiniun da Silvio Dietrich ch'il temp da lavur che stat a disposiziun per far la lavur è savens betg suffizienta. Quai maina a la situaziun ch'il temp che mainascolas stattan en uffizi è actual sulet tar in zic dapli che dus onns. Vidlonder vegn che las pretensiuns da la societad envers la scola vegnan cun il temp adina pli autas.
La societad pretenda e pretenda. Co che nus vegnin d'ademplir tut quai è in'autra dumonda. Quai è dentant in fenomen general e na pertutga betg mo il sectur da scola.
Duvrais in'idea per ina lecziun che tracta las medias? Vulais visitar RTR ed emprender co far videos u identifitgar «fake-news»? U duai RTR vegnir tar vus e far in'emissiun ord scola?
Sut rtr.ch/uffants/scola chattais Vus tut las infurmaziuns.