Mainascolas èn in zic sco ils dirigents da las scolas. Els u ellas èn quels ch'han u stuessan avair sut controlla tut. Uschia vesan era ils mainascola sez lur lavur.
Quai è sco il schef en ina scrinaria. Igl è d'organisar e guardar che tut funcziuna.
Igl è d'organisar sco in manager dad ina firma.
En mintga cas èsi ina lavur multifara. Tuttina sch'ins è mainascola en la Val Müstair, en il Grischun Central u sisum la Surselva. E plinavant na saja betg in di sco l'auter, raquintan ils manaders da scola. La lavur sa midia cuntinuadamain, onn per onn. La diversitad da la lavur sco mainascola saja creschida. Per ina bler dapli lavur administrativa – ma era sfidas cun il nov plan d'instrucziun u era cun las pretensiuns da tuttas varts, che sajan creschidas. Numnar tut quai che saja sa midà ils ultims 20 onns? Strusch pussaivel.
I vegn adina vitiers dapli.
Tut è era vegnì pli cumplex.
La clamada dal mainascola ha fatg in svilup. Pli baud, u mo avant 10-15 onns era savens in scolast u ina scolasta era anc in zic mainascola dasperas e insaco funcziunava quai. Ozendi fiss uschia ina varianta dentant strusch pli pussaivla.
Jau na crai betg ch'ina scola funcziunass ozendi bain senza in manader da scola.
Ozendi dettia bler dapli interess en ina scola ch'anc avant 10-15 onns. Sche jau patratg vid las structuras dal di, vid pedagogas e pedagogs curativs u vid la lavur sociala. Quai saja tut rauba ch'i na deva pli pauc u insumma betg avant intgins onns.
Malgrà tuttas sfidas – ina bella clamada
Igl è ina clamada intensiva e pretensiusa. Ina clamada ch'è sa midada fitg ils ultims onns. Mo per ils mainascolas èsi cler ch'igl è tuttina ina bella clamada che porta blers avantatgs. Ins haja bler contact cun differentas persunas ed invista en tut ils stgalims da la scola. Plinavant saja ina clamada cun differentas funcziuns ed incumbensas, nua che mintgadi saja differents, raquintan ils manaders da scola.
