Tar velos stat vinavant la mecanica en il center. La mecanista u il mecanist da velos resta fidaivel a ses num. Ils davos onns èn percunter champs da lavur sco l'electronica e l'informatica vegnids vitiers. Quai betg mo pervia dals velos electrics, mabain era tschels velos han cumponentas electronicas. Las novas transmissiuns electronicas èn in exempel. Per pudair analisar ils disturbis ston mecanistas e mecanists da velos savair ir enturn cun instruments da mesirar.
E-bikes han pli blera paisa, èn pli sperts e dovran uschia dapli mantegniment, tge che dat dapli lavur.
Quella nova diversitad fa vegnir il mastergn pli interessant e dumonda dapli savida. Perquai ston mecanists adina star sin il current ed enconuscher ils novs products. Plinavant hani la pussaivladad da sa scolar vinavant, quai cun curs supplementars ed er cun scolaziuns superiuras suenter l'emprendissadi.
Il persunal spezialisà manca
Chattar persunas dal fatg è ina sfida. Er las plazzas d'emprendissadi n'èn betg occupadas cumplettamain. Tenor la pagina d'internet da la cussegliaziun professiunala hai passa 60 plazzas betg occupadas en l'entira Svizra. Lavur hai detg avunda. Il mecanist cun agen lavuratori a Rabius, Gabriel Candinas, ha mo en in di in tozzel revisiuns e reparaturas vi da velos da tuttas sorts. Bainbaud vegn el a survegnir in nov emprendist, tge ch'è tenor el in cletg, vis la situaziun actuala. La glieud giuvna vegn gugent la stad a gidar or en stizun ed en il lavuratori. Forsa pudess quai er avair in'influenza sin il futur. Forsa sa decidan intginas u intgins per l'emprendissadi sco mecanista u mecanist da velos.
