Dad ina vart saja quai in svilup positiv, ha ditg la pledadra da medias Yvonne Dünser envers il schurnal regiunal da SRF. Durant la pandemia saja il transport da velos stà il sulet che haja prendì tiers. La Viafier retica resentia che las destinaziuns da vacanzas mettian lur focus pli e pli fitg sin ils bikers e che bleras han cumprà in velo durant la pandemia.
Soluziun per lingia dal Bernina
La medaglia ha dentant adina duas varts ed uschia la massa da velos. Per part vulan tants velocipedistas e velocipedists transportar lur vehichels il medem mument, ch'i n'haja betg plaz per tuts en il tren. Quai è per exempel il cas sin la lingia dal Bernina. Là han els dapi in onn chattà ina soluziun: Numnadamain in transport parallel. Ils velos vegnan transportads cun in bus e las viagiaturas ed ils viagiaturs pon ir cun tren.
En l'Engiadina Bassa nua che la problematica è sumeglianta han ins prendì en mira ils vaguns sez:
Nus avain bajegià enturn ils vaguns ed uschia procurà per dapli capacitads. Tranter auter avain nus era prendì ora sezs a favur dals velos.
Per viagiaturas e viagiaturs poi uschia dentant esser pli grev da chattar in plaz da seser. Plinavant dovri temp da chargiar e stgargiar ils velos, cunzunt sch'i saja tants ensemen. Uschia po il tren savens avair retard. Che quai saja malempernaivel chapescha Yvonne Dünser. Tuttina na po la Viafier retica betg s’imaginar ch'ils viagiaturs ston reservar in plaz per il velo – uschia sco quai ch'ins sto far tar la SBB. Pli gugent vulan els infurmar las bikeras ed ils bikers nua e cura ch'i po vegnir cnap cul plaz.
Soluziuns per il futur
Tuttina stoppia sa midar insatge en il futur – e quai en l'entira branscha, manegia la pledadra da medias. Il mument pondereschan els da bajegiar vaguns pli flexibels. Vul dir, ch'ins pudess prender ora a moda e maniera simpla ils sezs sch'ins ha puspè ina giada da transportar blers velos.