L'implant fotovoltaic en la Val Nalps a Tujetsch vegn realisà. Quai ha l'interpresa d'energia Axpo communitgà. L'indriz solar è planisà sin bun 2'000 meters sur mar datiers dal lai da serra Lai da Nalps. L'implant vegn ad avair ina prestaziun da radund otg megawatt. Uschia vegnia producì radund 11 uras gigawatt per onn, communitgescha l'interpresa.
Il focus è da rimnar experientschas
L'electricitad che vegn producida è gia vendida. Las Viafiers federalas svizras vegnan a cumprar durant 20 onns l'energia. Uschia vegnan ils trens provedids cun energia regenerabla. Economicamain resta il project tuttina ina sfida. Il focus per l'Axpo saja perquai da sviluppar vinavant l'energia solara en Svizra. Il project da pionier haja cunzunt la finamira da chattar ils cunfins d'ovras solaras en regiuns alpinas e da sviluppar soluziuns che funcziunan tecnologicamain ed economicamain a lunga vista.
Il focus è da sviluppar soluziuns ch'èn supportablas tant tecnologicamain sco era economicamain a lunga vista.
Tujetsch a la testa
Da tut ils projects dal Solarexpress en Grischun è Nalpsolar pir il segund che vegn en la fasa da construcziun. Sco il num tradescha, sa chatta era l'auter project – nua che gia 19 maisas cun cellas solaras èn en funcziun – en la medema vischnanca: Sedrunsolar. La vischnanca saja loscha da porscher ina contribuziun al svilup da l'energia solara en Svizra, vegn il president communal Martin Cavegn cità en la communicaziun
Cun Nalpsolar mettain danovamain in ferm segn per la producziun d'energia regenerabla.
Nizzegiar il Solarexpress
Las lavurs da construcziun duain cumenzar il mars 2025, l'aura decida cura exact. Per ademplir las premissas per il Solarexpress da la Confederaziun, duain 10% da l'implant gia vegnir colliads cun la rait la fin dal 2025. Lura vegn mintgamai cuntinuà en etappas durant la stad.
Or da l'archiv: