Ils chors han da sbatter per tschertgar chantaduras e chantadurs. Ed era sch'in dirigent dat ina giada giu ses post survegn la suprastanza in puls in pau pli aut. Ina alternativa da chantar en in chor en projects che duran pli curt temp ed èn persuenter pli intensivs
Willi Derungs che deriva da Vignogn e viva a Berna organisescha en Surselva mintga onn ina emna da chant. Sper diriger differents chors en la bassa instruescha el era a la Scol'auta da musica a Turitg e viva uschia da la e per la musica ed il chant. Willi Derungs enconuscha bain las differenzas tranter chantar en in chor u durant in project.
La lavur sco tala da diriger n'è betg uschè differenta. La finamira è adina d'avair ina buna interpretaziun e qualitad da mintga ovra. La gronda differenza è il temp da vegnir tar quest resultat.
Fertant che chors elavuran lur ovras durant mais, avant che sa preschentar, cuzza in project mo paucs dis u exercizis. Valeria Pfister, ina participanta a l'emna da chant tradescha tge che plascha ad ella tar projects.
En in'emna fan ins in grond progress. Ins emprenda ina massa, ins profitescha ina massa. Igl e insaco pli intensiv.
Quai munta ch'ils chors han da concurrenzar cun tals projects per ils chantadurs e las chantaduras. Ils projects han en questa gusia tenor Willi Decurtins in avantatg.
Pli curt ch'il temp è e forsa pli simpel ch'igl è da chattar insatgi. Blers na vulan betg sa liar per in entir onn.
Chattar in dirigent è ina sfida
Suenter avair dirigi durant 10 onns il chor maschedà da Vignogn ha il dirigent Gieri Spescha abditgà ses post. Suenter sia communicaziun ha la suprastanza gì il pensum da tschertgar ina successura ni in successur. La tschertga è stada difficultusa ed il president dal chor, Oscar Blumenthal, aveva prest dà si la speranza.
Suenter che nus avevan gì chantà a la perdanonza da Vignogn hai jau gì il davos in mument emoziunal immens. Suenter la davosa chanzun hai jau pensà, ussa èsi finì! Quai ha schon fatg mal.
Entras discurs a la maisa radunda ha il chor la finala ussa tuttina chattà ina successura sco dirigenta. Uschia sa la istorgia dil chor avanzar. Tgi precis che la dirigenta è n’ha Oscar Blumenthal anc betg vulì tradir. La raschun è ch’ella vegn per elegida uffizialmain a chaschun da la proxima radunanza generala l'entschatta november