Il chantun ha serrà il center per requirentas e requirents d’asil en l'anteriur hotel Rustico a Laax. Suenter 12 onns cun buns e main buns temps surdat il chantun il glindesdi uffizialmain las localitads dal Rustico a l’interpresa da l'investur Werner Spitz ch’è dapi intgins onns possessur dal Rustico. Co i va vinavant cun il Rustico na vul il possessur dentant anc betg tradir. L'anteriur center da transit ha purschì plaz a tranter 60 e 90 requirents d'asil.
Georg Carl, il manader da la partiziun asil e return da l'Uffizi chantunal da migraziun e da dretg civil di, ch’il chantun haja gì buns onns sco affittader dal Rustico a Laax dapi l'onn 2015.
Il grond problem avain nus gì avant il 2015, pia avant che l'emprim requirent d’asil è sa chasà en il Rustico.
Pervia d’in recurs da la vischnanca da Laax fin a la Dretgira federala haja il chantun stuì spetgar e pudì laschar entrar las emprimas requirentas e requirents d’asil pir dus onns pli tard, l'onn 2015 en il Rustico. «Cun pitschnas excepziuns èn las requirentas ed ils requirents d’asil dentant vegnids acceptads fitg bain da la populaziun e dals turists ils davos 10 onns.»
Conflicts sco dapertut
«Natiralmain ch’igl ha dà inqual hurscha», di Georg Carl da l'Uffizi da migraziun e da dretg civil dal Grischun. «Jau ma regord per exempel che nus avain survegnì annunzias d'osps dal bogn sper il Lag Grond che han reclamà che las rivas dal lai sajan surchargiadas cun requirents d’asil.» Insaco haja l'uffizi adina pudì schliar tals problems cun integrar tut ils partenaris a la discussiun. Inqual disturbi dettia dapertut nua che blera glieud vivia sin in pitschen spazi, di Georg Carl en discurs cun la FMR. «A Laax avain nus ils davos onns gì ina buna collavuraziun cun la vischnanca, igl ha dà voluntarias e voluntaris ch’èn sa gidads cun nus e las pendicularas Arena Alva han dà blera lavur a las requirentas e requirents d’asil.»
Tuttenina trais giadas dapli
L'Uffizi chantunal da migraziun e da dretg civil aveva previs gia ils onns 2021/2022 da serrar il center Rustico a Laax perquai ch’igl aveva paucas requirentas e requirents d’asil, di Georg Carl. Da quest temp aveva il chantun era serrà centers da transit en auters lieus sco per exempel Lizirüti u Mustér. Ma tut surura saja quai sa midà perquai che la guerra en l’Ucraina haja cumenzà. Tuttenina sajan ins stads leds e cuntents d’avair il Rustico. «A partir da la primavaira 2022 avain nus puspè avert novas dimoras e talas che nus avevan serrà.»
Avant la guerra en l’Ucraina avevan nus circa 370 requirentas e requirents d’asil en il Grischun, suenter la guerra ha quai dà in plum e nus avevan tuttenina 1'200 persunas che tschertgavan in suttetg.
Marmorera quasi la successura per Laax
En la chasa da turists e vacanzas Scalottas a Marmorera è planisà il nov center per requirentas e requirents d'asil. Previs èsi da dar domicil a fin a 30 persunas, entant che la capacitad maximala munta a var 80 fin 90 plazs, scriva l’Uffizi da migraziun e dretg civil dal Grischun sin dumonda. Gia fatgas èn lavurs da sanaziun - sco per exempel in nov stgaudament, ina cuschina ed installaziuns sanitaras. L’uffizi per migraziun e dretg civil dal Grischun maina il center ed è responsabel per l’assistenza dals requirents d’asil. La vischnanca è responsabla per incumbensas communalas sco il register d’abitants e la dismessa da rument. La populaziun duai anc vegnir infurmada ad in'occurrenza publica.
«Nus tschertgain adina en il Grischun»
Tenor Georg Carl è ses Uffizi chantunal da migraziun e da dretg civil mai a la tschertga d’alloschis per requirentas e requirents d’asil en ina regiun specifica dal Grischun. «Nus tschertgain adina en l'entir chantun. Quai communitgain nus era en noss inserats. E nus tschertgain adina a mez lunga vista, per che nus possian reagir suveranamain sch’i dat tuttenina novas undas da fugitivs.» Tenor Georg Carl èsi era impurtant da tschertgar avdanzas ad uras perquai ch’i possia cuzzar mais, sche betg schizunt onns fin ch’in nov alloschi possia vegnir avert.
Or da l'archiv: