Il cumbat da Reto Gurtner encunter il center transitoric per requirents d’asil a Laax en il hotel Rustico è enconuschent. Pli pauc enconuschent è, che la Arena Alva ha engaschà requirents d’asil. Per il mument èn quai 8 persunas.
Requirents d'asil èn bain vegnids a Laax
Sco quai che Reto Gurtner di, haja quai da far nagut cun ses cumbat encunter il center transitoric per requirents d’asil a Laax.
El haja cumbattì la tenuta dal chantun da concentrar en Surselva ed ella Foppa gest dus centers per requirents d’asil. El na haja mai cumbattì ils requirents sco tals.
Sche abitants d’in dals centers survegnan la lubientscha da lavurar, saja el pront d’engaschar quels. Dal reminent haja el engaschà requirents d’asil gia ditg avant che il center a Laax saja vegnì avert.