Il mars avant in onn è Lilya Havrylova fugida cun sia figlia da l’Ucraina en Svizra. En il center da transit «Rustico» a Laax han mamma e figlia chattà in emprim nov dachasa. En l’Ucraina era Lilya scolasta d’englais, tudestg aveva ella emprais durant in practicum en Germania. Davent da l’entschatta ha ella gidà en il center da transit cun translatar per la glieud da l’Ucraina.
Suenter dus mais a Laax han Lilya e sia figlia fatg midada a Cuira en in’atgna abitaziun. La gronda speranza da la dunna giuvna: chattar ina lavur fixa – e fin ch'ella haja ina lavur vegnia ella gugent vinavant en il «Rustico» per gidar.
Chantun fa pli grondas stentas per integraziun
Avant in'emna ha il Chantun grischun annunzià da rinforzar ses persunal per gidar a las ucranaisas ed ils ucranais. Trais novas plazzas ha el occupà: duas jobcoachas ed in jobcoach. Ina da las jobcoachas è Carmen Disch.
Las persunas che vegnian a la cussegliaziuns sajan tuttas fitg motivadas da chattar ina lavur e s'integrar. Tar l'emprim discurs giaja surtut per vegnir a savair sco la situaziun actuala saja, nua che la persuna stettia, tge ch'el ni ella haja gia fatg per chattar lavur.
La pli gronda sfida è la lingua.
Uschia dovria ins tar las bleras cussegliaziun in translatur u ina translatura. Er ils diploms ch'ils clients e las clientas portian da lur pajais oriund na sajan per part betg las medemas qualificaziuns sco en Svizra. La basa per pudair s'integrar en il mund da la lavur restia dentant la lingua. Quels e quellas che vegnian ad ina cussegliaziun sajan activamain e cun motivaziun vi d'emprender tudestg – i dovria simplamain temp per cuntanscher in tschert livel.
Fin uss èn paucas emploiadas
Tenor il chantun lavuran mo paucas persunas da l'Ucraina, e sche, lura plitost en secturs che pretendan paucas qualificaziuns. Intgins dals Ucranais e da las Ucranaisas hajan dentant qualificaziuns «interessantas», scriva il chantun la gievgia ils 16-02 en ina communicaziun.
Tenor il post spezialisà per l'integraziun hajan 12,6% dals var 1'400 fugitivs e fugitivas il mument lavur. Quels che n'hajan betg lavur, ubain er interpresas grischunas che han interess, possian s'annunziar tar ils jobcoachs e las jobcoachas dal chantun.
La Clienta Tatyana Dogaeva
Che la lingua è ina sfida senta er Tatyana Dogaeva. Ella viva dapi l'onn passà en in alloschi collectiv a Cuira. Ella ha gia fatg emprimas experientschas, ed ha lavurà per in mais per in'interpresa da schubregiar. I saja dentant stà vess, perquai ch'ella na sappia anc betg uschè bain la lingua. Actualmain fa Dovaneva in curs da tudestg per emprender meglier ella.
L'emprim discurs cun la cussegliadra saja stà fitg empernaivel ed ella haja pudì prender cun ella bleras bunas infurmaziuns e speria che quai gidia da chattar spert ina lavur.
Oriundamain è la dunna da 53 onns inschignera – dentant haja ella lura sa fatg independenta sco contabilista. En quella branscha, ch'ella haja plirs onns experientscha, lavurass ella gugent er en Svizra. Ella stoppia dentant dir sinceramain, che sia finamira saja da turnar tar sia famiglia en l'Ucraina. Ella stimia fitg tut che la Svizra haja fatg per ils Ucranais e las Ucranaisas. E quai vul Tatyana Dovaneva dar enavos cun quai ch'ella lavuria qua en Svizra.
Carmen Disch dal Chantun ha fin uss mo fatg experientschas positivas . La glieud s'annunzia independentamain e fin ussa s'haja gì in dumber cuntentaivel d'annunzias. Quels e quellas che fan diever da la purschida derivian dals pli differents secturs da lavur ed hajan las pli differentas scolaziuns – blers hajan fitg bunas scolaziuns ni perfin in certificat universitar.
Chattà ina lavur fixa
Suenter dus mais a Laax han Lilya e sia figlia fatg midà a Cuira en in’atgna abitaziun. La gronda speranza da la dunna giuvna: chattar ina lavur fixa – e fin ch'ella haja ina lavur vegnia ella gugent vinavant en il «Rustico» per gidar.
Entant ha Lilya Havrylova è ella emploiada da l’Uffizi per migraziun e lavura en l’alloschi collectiv a Cuira. Fin ussa haja ella lavurà sin basa da paja per ura. Ussa haja ella dentant in nov contract fix davent da l’entschatta mars. Da far dettia avunda, saja quai per exempel cun translatar tar il medi u gidar en biro, sia agenda saja plaina cun termins fin l’avrigl. Lilya di ella saja fitg cuntenta qua en Svizra, i giaja bain cun ella ed ella sa legra fitg da sia lavur fixa.
