Quest onn datti in’ovra musicala, cumponida spezialmain per quest intent. Ils cumponists Flavio Bundi e Remo Derungs han scrit communablamain l’ovra «Convivenza». Il toc sa cumpona da trais parts ch’èn mintgamai deditgadas als abitadis vischins da la Lumnezia, la Val s. Pieder e Sursaissa Mundaun. L’entschatta e la fin da l’ovra furma ina part sumeglianta che maschaida las differentas linguas discurridas en ils trais abitadis, declera il cumponist Remo Derungs.
In viadi musical tras la Val Lumnezia
L’emprima part suenter l'introducziun raquinta l’istorgia dal ir davent e da chattar insatge nov – per construir là ina nov'existenza. Il tema fa endament l’emprima glieud ch’è sa chasada en la Lumnezia sco er il viadi dals Gualsers avant ch'els èn arrivads en lur nov dachasa muntagnard. Suenter questa part per la Lumnezia datti ina part pli brutta che maina en la Val s. Pieder, nua che la musica vegn – ina giada arrivada en la val – puspè pli miaivla. La part che suonda è puspè pli brusca cun tuns pli schregs. Ella maina alura vi en la part da Sursaissa che cuntegn tranter auter in duet dal soprano cornet ed da l’eufonium.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
Collavuraziun musicala
Flavio Bundi haja cumponì la part per il chor che descriva musicalmain ils lieus nua che la glieud è sa chasada. Remo Derungs haja alura «emplantà» la musica da sturs. Lezza circumscrivia il viadi cun las parts ch’èn per part pli bruttas, ma entras la sumbriva da Val e Sursaissa er pli melanconicas. Il toc sa bajegia si plaun a plaun. L'ovra musicala cun in «tubular bell», ina sort zain, è ina constanta che va tras l’entira ovra, tge che simboliseschia la spiritualitad e la cardientscha. Pertutgant la lirica declera Remo Derungs ch’els hajan resguardà tut ils linguatgs discurrids en ils trais abitadis.
La part dal chor hai jau arranschà e tar il rest hai jau cumponì. La musica da sturs è plitost la via tar ils lieus ed il chor tracta alura il lieu sez.
Nus essan en tut ils trais tocs autentics tge che pertutga il linguatg. Nus avain il Lumnezian ed er ils linguatgs dals Gualsers da Val e Sursaissa.
Il chor da project ad hoc enturn il Chor da Suraua e la Musica giuvenila Surselva interpreteschan l'ovra dals dus cumponists en in sulet concert communabel, questa sonda en la halla polivalenta da Vella. Cun l’ovra na vegnan uschia betg mo vischinadis cun linguatgs e culturas differentas ensemen, mabain er giuven e vegl, cun quellas e quels ch'interpreteschan ella.
