Co pudess la «Casa Vinavon» ch’è l’anteriura scola da puras vesair or en l'avegnir? Tge diever pudess il bajetg avair? Co pudess ins mantegnair tscherts elements dal bajetg existent? Quai las dumondas che las studentas ed ils students da la Scola auta spezialisada dal Grischun han gì da reflectar per concepir lur projects d’architectura. 18 models tridimensiunals cun ina legenda explicativa spetgan las visitadras ed ils visitaders da l’exposiziun.
La finamira da quest'exposiziun è tranter auter da mussar las lavurs da las studentas e dals students – ed era d’inspirar la glieud cun ideas per sviluppar vinavant.
Il gir duai er mussar a la glieud tge che la claustra ha uschiglio anc da porscher. L’exposiziun maina da l’entrada tar il café, tras ils sulers en il tract da scola enfin ils locals da segiurn.
Impressiuns da la vernissascha
-
Bild 1 von 7Legenda: Bainvegni en la baselgia. RTR -
Bild 2 von 7Legenda: En ina gronda part da la claustra èn ils models exponidas. RTR
-
Bild 3 von 7Legenda: Model tridimensiunal per visualisar ils projects. RTR
-
Bild 4 von 7Legenda: Novas furmas architectonicas per ina veglia chasa. RTR
-
Bild 5 von 7Legenda: L’equipa da la Scola auta spezialisada dal Grischun ha explitgà las lavurs als osps: Larissa Good (anteriura studenta) Mirco Blöchlinger (collavuratur) ed Urs Padrun (architect e docent). RTR
-
Bild 6 von 7Legenda: Visitadras e visitaders davant in dals projects. RTR
-
Bild 7 von 7Legenda: Apero e discurs durant la vernissascha en la claustra. RTR
Projects socials predomineschan, er sche quai n’era betg la premissa da diever per las studentas ed ils students. Tge diever ch’il bajetg duess avair n’era betg definì. Ch’i ha alura dà projects sco ina chasa da naschientscha, ina clinica per persunas cun burnout u in dachasa per glieud cun impediments, plascha a la sora Annemarie, la priura generala e presidenta da la fundaziun da las Dominicanas. Il connex cun l’istorgia e la vischinanza da la claustra fetschia plaschair ad ella.
Igl è stà bel, cunquai che nus avain formulà la dumonda a moda fitg averta. Uschia hai dà differents projects nua che mintgin ha pudì integrar sia vista persunala.
Las studentas ed ils students che han terminà lur studi da bachelor èn er stads libers pertutgant restricziuns da la lescha da bajegiar. I saja stà impurtant da crear insatge che maina tar ideas cuntinuantas, uschia l'architect e docent Urs Padrun che ha accumpagnà ils students durant questa lavur.
Las studentas ed ils students ston observar l’istorgia – pia tge è stà, tge è ussa e co san ins sviluppar vinavant insatge.
L’exposiziun che cuzza enfin il matg 2025 è uschia ina plattafurma per las studentas ed ils students da preschentar lur lavurs. E las soras dominicanas mussan cun il gir tras la claustra ils bajetgs – forsa era a tala glieud che vul en l’avegnir investir en novs projects sin la spunda da Quinclas. Las soras demussan er ch’ellas planiseschan lur sfidas per l’avegnir cun in spiert creativ. In zic sco architectas.