Las soras vegnan a dar en locaziun u vender ils bajetgs ch'ellas na basegnan betg pli per l'agen diever. In exempel concret è il «Albertushof» ch'è actualmain mess en vendita. Il possess agricul n'è gia dapi in temp betg pli in sectur che las soras dominicanas mainan. Il Cussegl da fundaziun da las soras dominicanas ha d'evaluar cun agid da spezialists, tge che fetschia economicamain il pli bler senn, uschia la priura generala, Sora Annemarie.
Quest pass è per nus ina sfida. Nus na savain betg guardar èn il futur e nus duvrain agid da persunas dal fatg
Il motiv principal per quest pass saja la diminuziun da la cuminanza dominicana, di la priura generala. Las soras na survegnan naginas novas commembras e lur media da vegliadetgna è sur 80 onns. Quai signifitga che las soras èn memia veglias per pudair lavurar en l'agen manaschi sco er en l'economia privata. Pli baud eran las soras surtut activas en la tgira, en il sectur social ed en la scolaziun. Las entradas or da da quellas activitads eran impurtantas per la communitad. En quest reguard hajan las soras dominicanas ademplì lur incumbensa, uschia Sora Annemarie.
Oz ston ellas surdar las lavurs ad emploiadas ed emploiads. Il manaschi dat lavur a 70 persunas ed è uschia in dals impurtants emploiaders en la regiun. Dapi il 2021 pon persunas externas daventar commembras dal cussegl da fundaziun. In sguard sin l'organigram mussa plinavant che persunas dal fatg externas mainan la gronda part da las partiziuns.
Dievers alternativs en accord cun la vita claustrala
En las localitads, nua che la claustra aveva ina scola ed in internat enfin ils onns otganta, han las soras dominicanas avert la chasa d'entupada, en tudestg «Haus der Begegnung». Las soras porschan uschia in lieu d'albiert e da scuntrada, saja quai per far vacanzas u per seminaris ed eveniments. Questa midada d'utilisaziun saja in success, e l'idea saja che la chasa d'entupada vegnia da sa purtar finanzialmain sezza, uschia la priura Sora Annemarie. Cun il Forum per la cultura da pasch ed il «Ilanzer Sommer», ina occurrenza tematica davart la pasch, haja la claustra attratg nova glieud en lur localitads. La lavur strategica giaja vinavant.
La Regiun Surselva ha fittà las localitads da scola en la claustra ed en la «Casa Vinavon» durant plirs decennis. Ella vegn a dischlocar ses lieu d'instrucziun en il center da Glion tar la staziun. Cunquai che quest pass capita però pir l'onn 2027 u 2028, hajan las soras dominicanas bain ponderà tge auters dievers che vegnissan en dumonda. Ellas fetschian en il mument dentant ina pausa da reflexiun per in diever futur, perquai che la bardigliada è pir en in pèr onns.
La claustra, il monument architectonic
Las soras dominicanas vivan en in bajetg marcant che sa chatta sin la spunda da Quinclas sur Glion. La fin dals onns sessanta han las soras incumbensà l'architect da Turitg, Walter Moser, da planisar lur nova chasa-mamma.
L'um che ha ussa varga novanta onns, ha bajegià 17 baselgias novas e renovà anc dapli bajetgs sacrals durant sia vita. El sa regorda gugent a la claustra da Glion, ina da sias pli impurtantas ovras.
Quest è stada ina grondiusa incumbensa, er pervi da las pussaivladads ch'ins aveva.
Walter Moser ha lavurà sco giuven architect dus onns a Helsinki tar l'architect da renum Alvar Alto. L'influenza saja visibla, di Walter Moser. L'architectura è modesta e armonisescha cun la natira. Savens cumpareglian ins la claustra da Glion cun la claustra Sainte-Marie de la Tourette en Frantscha dal renumà architect Le Corbusier. Tenor l'architect turitgais saja quai pervi da las pitgas en las spunda che portan ils bajetgs. Ma il stil da Le Corbusier saja pli rubiesti cun il betun brut. Lez haja er construì ina curt serrada, tge ch'è tar la claustra da Glion auter. La curt è averta vers il sid e sias fatschadas èn simplas ed alvas sco il habit da las soras dominicans. Plinavant han las lavurs dal sculptur Alfred Huber e las fanestras da la baselgia da Max Rüedi procurà per in'ovra atemporala.
