La radunanza da presidents da la Surselva ha decidì da metter ensemen las scolas da Glion sin il medem areal. La scola mercantila, la scola media spezialisada sco era la scola «vinavon» cun las purschidas per il 10avel onn da scola duain vegnir en il nov bajetg da la staziun da Glion. Per quest bajetg ha la Viafier retica lantschà ina concurrenza d’architectura.
Sfida per la claustra
Per la claustra da las Dominicanas da Glion munta quai ch'ils locals da scola ston vegnir occupads insaco auter. Sco qua che la priura generala, sora Annemarie Müller ha ditg, saja quai ina sfida per lur cuminanza.
Il privel che nus na pudain betg occupar questas localitads è dà. La Regiun Surselva ch'avess quasi da s’empatschar dals interess regiunals, lascha nus en quest senn in zic en la buglia.
-
Bild 1 von 8Legenda: Ernst Sax, è persvadì dal nov plaz per las scolas. RTR, Linus Livers -
Bild 2 von 8Legenda: Priura generala Annemarie Müller deplorescha che las scolas bandunan la claustra. RTR, Linus Livers
-
Bild 3 von 8Legenda: Ils var 30 scolars da la Scola vinavant vegnan actualmain instruids en quest bajetg. RTR, Linus Livers
-
Bild 4 von 8Legenda: La claustra, datiers e tuttina navend da la truscha da la citad. RTR, Linus Livers
-
Bild 5 von 8Legenda: Las scolas duain far midada da la claustra a la staziun. RTR, Linus Livers
-
Bild 6 von 8Legenda: La claustra è in zic davent da la truscha da la citad. RTR, Linus Livers
-
Bild 7 von 8Legenda: Quest tetg dal sutpassadi è mo in provisori fin ch'il bajetg nov vegn construì. RTR, Linus Livers
-
Bild 8 von 8Legenda: Qua vegn bajegià la staziun e la scola nova. RTR, Linus Livers
Avantatgs a la staziun
Ernst Sax, il president da la Regiun Surselva, che maina las trais scolas vesa dentant be avantatgs en questa midada. Il nov plaz saja pli visibel, cuntanschibel meglier cun il traffic public e la collavuraziun cun la Viafier retica saja in garant per l'avegnir da questas scolas. L'avantatg dal plaz vegl sper la claustra cun ruaus idillic senza tentaziuns da las butias ed ustarias, ha betg persvadì ils presidents da la Surselva.
Sco consolaziun porscha la Regin Surselva maun a la claustra cun il sviluppader d’economia regiunal che gida las Dominicanas a chattar novs locataris. La midada vegn probabel betg a succeder avant l'onn da scola 2022/2023. Ils var 180 scolars e scolaras sin l'areal da la staziun da Glion, èn ina schanza ed ina sfida il medem mument.