Sia candidatura ha el preschentà avant in onn, ils 11 da schaner 2024. Lura ha Christoph Schmidt communitgà uffizialmain ch'el candideschia per il post da president communal da Flem. Igl è stà ina surpraisa che l'hotelier veglia succeder a Martin Hug. Lez aveva annunzià ch'el bandunia Flem e daventia directur da las pendicularas da Zermatt.
Il medem mument sco Christoph Schmidt ha er il commember da la suprastanza Nicola Fantini annunzià ses interess per il presidi communal. Ils 22 da settember 2024 ha Christoph Schmidt dentant gudagnà la cursa. En l'emprim scrutini han ils da Flem dà ad el – cun ina participaziun da 66% – la precedenza. L'indigen Christoph Schmidt ha cuntanschì 546 vuschs, tar in pli absolut da 513, ses concurrent Nicola Fantini 411 vuschs. Nicola Fantini aveva candidà per ina segunda perioda en la suprastanza ed ils da Flem han dà ad el la confidenza.
Il prim da schaner 2025 ha Christoph Schmidt surpiglià il timun da l'executiva nova. Ensemen cun el e cun Nicola Fantini fan anc Laurène Gartmann (nova), Sol-Brit Bonderer e Guido Casty part da la «regenza» da Flem.
In hotelier passiunà daventa president communal: Survegnan ils da Flem uss in ospitant etablì?
Gea, quai pos jau confermar. Il pled fa gea allusiun a l'osp. Sco hotelier han ins gugent carstgauns enturn sasez, ed in ospitant sto avair gugent carstgauns. Quai vuless jau er importar en il presidi communal.
En l'hotellaria vala la moda da dir «l'osp è il retg». Co duai quai ussa valair en Voss uffizi politic?
La moda da dir che l'osp saja il retg era pli baud ina regla. Dentant oz sun jau vegnì sez a la conclusiun che quai duai avair ses cunfins. Uschè prest che l'osp na respecta betg pli mai, na vuless jau era betg dar albiert ad el. Quest respect vicendaivel è la cundiziun en il barat tranter ils carstgauns. Envers tut ils carstgauns duess'ins pudair guardar en ils egls in a l'auter. L'interess vicendaivel è decisiv per pudair sa barattar e chattar bunas vias e schliaziuns.
Il president communal che ha gugent carstgauns enturn sasez ha dentant da dumagnar ina sfida: El sto represchentar leschas, normas e directivas che n'èn forsa betg uschè popularas e ch'ils convischins na vulan betg chapir. Co vegnis Vus a frida cun quai?
Sco en la relaziun cun ils osps vala era qua la chapientscha vicendaivla per ils pensums e la cuminanza. Per gudagnar la fidanza dals convischins è quai cumbinà cun in barat transparent ed in agir plausibel. Quest dialog e la confidenza decidan sch'ins vul intermediar il senn da las activitads politicas inclusiv relaschar leschas ed ordinaziuns.
En la perioda d'uffizi ch'ha cumenzà manais Vus ina suprastanza communala nova. Constat la chemia, tenor Vossa opiniun e Voss sentiment, en questa squadra ch'il pievel ha elegì?
Singuls collegas hai jau emprendì d'enconuscher tant privat sco era sco commembers da la davosa suprastanza communala. Laurène Gartmann ed jau essan ils novs en il team e nus vegnin quasi cun sang frestg. Jau sun persvas che la nova suprastanza communala da Flem è in'equipa empermettenta cun persunalitads e carstgauns differents. Questa primavaira, a chaschun d'ina dieta interna, vegnin nus a definir ils accents, la strategia communala e discurrer d'ideas novas.
La legislatura passada 2021-2024, sut il timun da Martin Hug, aveva la suprastanza prendì bleras finamiras, elavurà e realisà ellas cun in pulit tempo. Vegn il president communal nov a cuntinuar cun questa spertadad?
Intginas fatschentas ed intgins projects vegnan segir ad influenzar nossa lavur. Da l'autra vart vegnin nus a tschentar, en il context strategic, era novs impuls ed importar quels en il program che nus vulain realisar.
Ils exempels currents na mancan betg: Center da sport Prau la Selva, Arena tectonica Sardona, spazi d'abitar per indigens, Parkhotel Waldhaus, chalur a distanza ed energia, posta veglia Casa d'Uaul....e.u.a.v.. Voss antecessur ha mussà ch'il dialog è impurtant per ch'i na dettia betg bloccadas. Previsiblamain cuntinuais Vus questa via?
Gea, 100%. Persunalmain viv jau, sco gia menziunà avant, cun il motto dal dialog. Mo quel porta vinavant la vischnanca. Sch'ins vul sviluppar e furmar insatge, sto la cuminanza esser inclusa. Latiers ston ins dentant avair en egl betg mo ils abitants indigens, mabain er ils indigens secundars sco era commerzi e mastergn.
Gist ils abitants secundars èn stads – almain ils ultims onns – ina gruppa fitg pretensiusa che ha giavischà e pretendì adina puspè in tractament spezial. È quai finì e betg pli in tema?
Ils indigens secundars n'èn betg mo pretensius. Els mussan era bler cuntentientscha e respect vers las vischnancas ed ils indigens. Jau ves ils possessurs d'abitaziuns secundaras sco gruppa loiala che dat impuls. Sch'i vegnan giavischs e pretensiuns spezialas da singuls, vegn quai en scadin cas prendì serius ed examinà. Dentant far endretg a mintgina e mintgin e da tuttas uras è in striegn che nus stuain emblidar.
Ils indigens èn confruntads cun la mancanza dad abitaziuns pajablas. Schliar quest problem pudess esser in grond accent da Voss uffizi?
Spazi d'abitar pajabel è d'avair ina tematica impurtanta. La vischnanca ha gia instradà intginas chaussas per meglierar la situaziun. La surbajegiada da la parcella 4002 a la Via dil Stuz è in dals pass, enfin la fin dal 2026 duessan 21 abitaziuns esser a disposiziun. Cun quai n'è la chaussa dentant ditg betg liquidada. Sut la punt da Stenna datti speranza il proxim temp 60 studios per emploiads e forzas da lavur. Igl è noss pensum d'integrar noss motor economic, il turissem, cun success ed a moda persistenza, e quai en concordanza cun natira e populaziun.
Il sforz da mobilisar terren da bajegiar vegn ad esser in'ulteriura dira nusch da Vossa legislatura?
Nus essan sfurzads da mobilisar terren da bajegiar, il svilup da la vischnanca dependa en mintga cas dals carstgauns che pon abitar qua a Flem. Ils 9 da favrer vegnan votantas e votants da Flem la segunda giada a prender posiziun en chaussa. I dovra ina pli gronda purschida d'abitaziuns pajablas, da quai dependa la finala il bun e saun svilup da nossa vischnanca.
Tempo 30 tras Flem è er en discussiun. Ha quella mesira pudì meglierar e mitigiar il traffic?
La reducziun da spertadad tras Flem gida d'augmentar la qualitad per ils abitants che vivan en il conturn. Pertutgant il concept dal traffic datti anc baintant da far. Ins sto da principi sa dumandar quants dis ad onn ch'i regia vairamain in traffic stravagant e surchargià tras Flem.
Durant ils dis tranter Nadal e Bumaun è Flem stà en las lingias grassas negativas da las medias, pervi dals fieus artifizials, malgrà scumond, e pervi dals disturbis da la nova pendiculara Flemxpress en il territori da skis. Quant fitg ha quai muventà Vus?
Sch'i dat critica en la publicitad, muventa quai adina ils responsabels. Tant pli impurtant èsi che nus acceptain la critica, restain vidlonder e schliain las sfidas. Lura èn las lingias grassas negativas spert emblidadas.
Co èsi stà cun quels dus cas?
Il Silvester passà è stà il segund onn ch'il scumond dad arder fieus artifizials è en vigur e che nus avain stuì empruvar da pratitgar la lescha. Senza dubi dovri anc ulteriuras mesiras da sensibilisar indigens, osps e turists. Ina controlla 100% è greva da cuntanscher, nus vulain quintar cun il sustegn e la chapientscha da tuts. Tar il cas da la pendiculara Flemxpress èsi da dir ch'igl è ina absoluta novaziun mundiala. Ch'i dat uschia ina tscherta intunaziun tecnica duess esser plausibel. Perquai han las pendicularas era communitgà dapi l'entschatta dal manaschi ils 13 da december ch'i saja in manaschi da test. Da quai n'han natiralmain betg tuts prendì notizia. A media vista sun jau dentant persvas ch'il Flemxpress vegn a daventar in grond success cun frequenzas adequatas.
La pendiculara nova sco grond magnet turistic. En quest connex èsi da constatar che Flem sauta sin duas nozzas: Turisticamain cun sias partenarias Laax e Falera e cun la Surselva, politicamain dentant cun Plaun. Co vesais Vus questa duplicitad?
Jau n'hai mai vesì quai sco duplicitad. Il spazi economic Flem Laax Falera na metta nagin en dumonda e la collavuraziun funcziuna er extremamain bun. Il nov project dal center da sport Prau la Selva è in ulteriur exempel da parada per la collavuraziun regiunala da las trais vischnancas. Las duplicitads ed eventuals custs e lavurs supplementars n'èn franc betg fitg gronds. Decisiv è il spazi economic, ed ils ulteriurs secturs accept'ins sco els èn. Tant pli èsi era qua impurtant dad ir encunter in a l'auter e ch'ins tschertga, là nua ch'igl è necessari, communablamain schliaziuns.
Or da l'archiv: