En destinaziuns turisticas è la relaziun dals indigens cun persunas che possedan segundas abitaziuns adina puspè tema e chaschuna magari discussiuns. La cuminanza d'interess da segundindigens da Flem, Laax e Falera ha dà en lavur in studi che duai mussar nua ch'i dat potenzial da meglierar la convivenza. Sin basa da quest studi da l'Universitad da Son Gagl ha la suprastanza da la cuminanza d'interess uss decis sin tge metter il focus.
Tranter auter pretendan ils segundindigens d'avair in sez en l'organisaziun turistica. Quai duai meglierar il dialog cun ils indigens e promover il svilup regiunal. Sper quai vul la cuminanza d'interess anc sa focussar sin ils suandants temas:
- organisar occurrenzas per segundindigens
- forums da barat cun indigens
- stgaffir ina carta da clients per segundindigens che porscha offertas per il commerzi local
Emprim studi da quest gener
Il studi da l'Universitad da Son Gagl che prenda sut la marella la relaziun d'indigens e segundindigens en ina regiun turistica saja l'emprim studi da quest gener, quai ha ditg la collavuratura scientifica Aristid Klumbies sin dumonda da l'agentura Keystone-SDA. Basa per quest studi sajan stads rapports da medias, datas da la regiun sco er intervistas cun 15 persunas indigenas e segundindigenas.
Sa mussà saja ch'er ils indigens giavischassan da collavurar pli fitg cun segundindigens ed uschia da sviluppar vinavant la regiun. La cuminanza d'interess spera uss che la politica locala e l'organisaziun turistica sajan avertas per las ideas.