En il messadi per mauns dal cussegl communal scriva la suprastanza da la vischnanca da Mustér ch’els hajan gia dumandà per daners per infrastructura turistica relevanta al sistem. Per survegnir tals daners basegna quai dentant ch’il hotel «Acla da Fontauna» vegn realisà, scriva la vischnanca. Il project è dentant bloccà tras in recurs ed daventa in cas per la dretgira. Da l’autra vart basegna quai ina collavuraziun intercommunala. Lezza saja vegnida instradada cun la cunvegna da prestaziun tranter il center da sport e cultura e il bogn Sedrun. Uschia pudess quai dar daners dal chantun.
Emprima etappa custa a la vischnanca 9,7 milliuns francs
Per l’emprima etappa vegn calculà investiziuns da 10,6 milliuns francs. Ina part da 450’000 milli francs duai vegnir restituida da la taglia sin la plivalur. Per far quest pass duai il center dentant quintar a partir dal cumenzament da la renovaziun cun la metoda effectiva da quintar la taglia sin plivalur, scriva la vischnanca. Era stoppian las investiziuns vegnir cudeschadas sur il quint dal center da sport e cultura quai ch’augmentia automaticamain las amortisaziuns ed ils tschains per ils emprests. In ulteriur daner da 460’000 francs duai vegnir da «Program San Gottardo». Quels daners vegnan dads a fonds perdu. Ultra da quai duai dar in credit da 2 milliuns francs senza tschains dal medem program.
Center da sport n'è betg propi visibel
La cumissiun instradada da la suprastanza ha surtut er evaluà l’impurtanza turistica dal center da sport e cultura. Quella saja fitg auta ed el haja vinavant ina gronda pussaivladad da augmentar anc questa impurtanza cun ulteriuras activitads. Uschia saja il center da sport e cultura d’ina vart en in fitg bun lieu ma el vegnia anc memia savens survesì. Perquai duai vegnir elavura cun partenaris concepts per promover las purschidas e per augmentar en futur quellas. Ina ulteriura proposta da la cumissiun è da midar il num en «Center Fontauna, Sport- recreaziun-occurrenzas». Quai saja in num chapibel per ils indigens e per ils giasts e descrivia era bain las activitads pussaivlas.
Emprim ha il cussegl communal da decider
Il cussegl communal da la vischnanca da Mustér vegn ils 5 da zercladur en ina sesida che vegn emessa via live-stream da discutar e la finala da decider sur dal credit da radund 10 milliuns francs. Il pievel vegn pli tard a decider a l’urna sur da la sanaziun dal center da sport e cultura.
