Il center da sport e cultura a Mustér duai vegnir sanà ils proxims onns. Il concept oriund era vegnì preschentà il schaner 2018. Lura aveva il cussegl da vischnanca intervegnì e pretendì da la suprastanza da surlavurar il concept. Quai han ils reponsabels fatg e preschentà ils resultats il schaner da quest onn.
Concept turistic vul dir: coordinar
Per pudair preschentar in project madir dovra la cumissiun center da sport e cultura anc dapli temp. Ord quest motiv ha la suprastanza spustà tut ils termins communitgads il schaner. Il punct essenzial è uss da coordinar l’entir concept cun las vischnancas vischinas.
Betg finanziar – ma sustegnair
Las vischnancas vischinas na stoppian betg gidar a finanziar il project, di Clemens Berther, president da la cumissiun center da sport e suprastant da la vischnanca da Mustér. Ma i dovria il sustegn e la coordinaziun per ch’i na vegnia betg construì purschidas dublas. Perquai stoppia vegnir coordinà tant cun ils vischins sco era cun ils investiders turistics en la regiun e la finala era cun l’entira regiun Surselva.
RR actualitad 07:00
