Avant trais emnas aveva RTR rapportà davart la chasa d'attempads s. Martin a Trun. Il medi da la chasa, Martin Tomaschett, aveva fatg grondas renfatschas: Ils responsabels da la chasa na prendian betg per mauns ils problems, els na sajan betg cumpetents avunda da manar la chasa ed il persunal, ils problems cun il persunal vegnian snegads. Ina unda da demissiuns da l'onn passà aveva gia caschunà critica dal persunal. Ils manaders da la chasa n'avevan betg prendì posiziun davart las renfatschas dal medi.
Sin las renfatschas ch'èn vegnidas sin maisa fin schaner ha la «Cumissiun casa» reagì cun ina brev a las persunas da contact da las cussadentas e dals cussadents. Ina ulteriura brev quasi identica ha ella tramess als delegads da la Corporaziun Casa da tgira Sutsassiala ed als commembers dal Cussegl da fundaziun da la Casa s. Martin. La redacziun dad RTR è en possess da quellas brevs.
La cumissiun che sa cumpona per gronda part dals presidents communals da Breil, Trun e Sumvitg, stettia cumplainamain davos il president, Daniel Tuor, sco er davos il mainachasa Donat Nay, scriva ella.
La Cumissiun casa ha nagins indizis che giustifitgassan ni da metter en dumonda lur engaschi, ni ina demissiun dad els dus.
Davant il microfon na vulan ils commembers da la cumissiun betg prender posiziun. Els renvieschan sin la fin favrer cura ch'els hajan alura ina sesida. Quai ensemen cun Andrea Brauch, la tgirunza diplomada cun furmaziun da manadra en fatgs da tgira ch'ils responsabels da la chasa han engaschà per meglierar la situaziun. Ils resultats e las mesiras da quella sesida vul la cumissiun alura communitgar.
En las brevs da fin schaner sincerescha la «Cumissiun casa» che la qualitad davart la tgira e la segirtad envers las cussadentas ed ils cussadents saja adina stada e saja garantida. Co che la cumissiun po garantir quai na tradescha ella betg en las brevs. Ella renviescha al plan directiv da plazzas che la Casa s. Martin sto trametter ina giada ad emna a l'Uffizi da sanadad. Dumandà latiers Rudolf Leuthold, il manader da l'uffizi, co el vesia quai, ha el ditg ch'el na possia betg dir insatge en il cas concret da la Casa s. Martin, ma l'Uffizi da sanadad na possia betg dar talas garanzias.
Garantir en quest senn n'è era betg insatge che nus savain far sco uffezi.
Tar la fluctuaziun dal persunal manegia la «Cumissiun casa» ch'ella saja vegnida orientada dal mainachasa e saja pertscherta da la quota da fluctuaziun e da la problematica dal persunal da tgira. Daco che la Casa s. Martin perda ses persunal en rotschas e tge mesiras ch'ils responsabels ha prendì, na respunda ella betg en la brev.
La suletta mesira activa è tenor la brev che la Casa s. Martin haja engaschà ina tgirunza diplomada cun furmaziun da manadra en fatgs da tgira. I suondia ina sesida cun lezza. Dapi la davosa rapportaziun dad RTR han duas ulteriuras tgirunzas demissiunà en la Casa s. Martin.
Sco che Rudolf Leuthold, manader da l'Uffizi chantunal da sanadad, ha ussa confermà envers RTR, hai dà tranter 10 e 30 reacziuns en furma dad e-mails en chaussa da la Casa s. Martin a Trun.
En il mument na pudain nus betg valitar quellas annunzias. Quai è ina procedura currenta. Igl è anc memia baud da dir insatge.
L'uffizi da sanadad vegnia ad intercurir quellas annunzias en ina procedura interna, ensemen cun las persunas pertutgadas.
Il rapport cun las renfatschas da la fin schaner
