Resort Dieni - 13 bajetgs e 1'800 novs letgs per Tujetsch

L’Andermatt Swiss Alps SA (ASA) vul construir a Dieni in nov quartier cun 13 edifizis e totalmain 1’800 letgs cun access direct al territori da skis Andermatt-Sedrun. Il dumber da letgs d'hotel en la Surselva crescha uschia per passa 20%. Tenor communicaziun munta il volumen d’investiziuns a 170 milliuns francs. Igl è l'emprim project da l'ASA sin la vart grischuna dal pass Alpsu. Sche tut va tenor giavisch, duajan las lavurs da construcziun esser terminadas fin il 2027. Il project preveda ina maschaida da hotel, appartaments, retail e gastronomia. La vischnanca da Tujetsch ha obtegnì la dumonda da bajegiar per il ressort a Dieni l'entschatta d'avust. Parallelamain èn ils profils vegnids montads.

Ch'il project vegn realisà gist uss ha da far cun la participaziun da la gruppa americana Vail Resorts che ha surpiglià sin l'entschatta d'avust la maioritad d'aczias da l'ASA. Quai ha ditg il mainafatschenta da l'ASA, Rapahel Krucker envers l'agentura da novitads Keystone-SDA. Or da questa midada vegn er ina gronda part dal chapital che vegn investì ils proxims onns.

Il president communal da Tujetsch, Martin Cavegn, quinta be cun pauc critica u recurs e cunquai er strusch cun retardaments pli gronds. Tenor el sustegnan ils indigens per gronda part il project.

Il project en detagl

Il resort vegn construì sin l'areal dal parcadi dal territori da skis a Dieni. En ils 13 edifizis duai dar 410 chombras da hotel e 119 abitaziuns che vegnan vendidas. Dasperas prevesa il project era trais restaurants, duas bars e diversas purschidas per il temp liber, per exempel in kino.

Per ch'il project saja persistent, duai l'entir resort vegnir stgaudà cun ina pigna da pellets da laina e 1'500 meters quadrat dal tetg vegnan cuverts cun fotovoltaica.

Tge di la populaziun dal nov ressort?

La gronda part da la populaziun da Tujetsch è cuntenta cun il project preschentà. Bleras chaussas eran gia enconuschentas. Uschia per exempel la grondezza ed era ils custs. La grondezza ha tuttina dà da discutar, surtut perquai che la populaziun da la vischnanca da Tujetsch è tar radund 1'300 abitantas ed abitants. Quai saja anc grev d’imaginar co quai saja alura, cura che dapli persunas sajan a Dieni ch’en il rest da la val, ha ditg in um. Ma il tenor principal è uss da spetgar co tut sa sviluppescha ed il sustegn per il ressort Dieni para propi d’esser avant maun en la populaziun. Ma sur da custs per la vischnanca, per exempel per il nov bus local, u per ils parcadis n’è betg vegnì orientà ed era betg discutà.