L'Uffizi da construcziun bassa e vegnì alarmà dumengia en connex cun la blera aua en l'Ova Sarsura, datiers da Zernez. La via chantunala tranter Zernez e Susch era vegnida inundada da las massas dad aua che l’Ovel Sarsura ha purtà, uschia che la via ha stuì vegnir serrada per pliras uras. Il responsabel per il circul quatter, Peder Caviezel, di ch'els èn stads al lieu avant che l'aua è culada sur la via ora.
![Susch Zernez Hochwasser](https://www.rtr.ch/static/cms/images/960w/e8b0bd.jpg)
Enfin che las maschinas èn stadas al lieu, saja il livel da l'aua creschì vinavant ed haja inundà la via. L'aua gronda haja er donnegià lingias d'electricitad d'ina ovra electrica pli ensi dal flum.
A San Niclà, in punct heicli, hai dà mesiras da segirezza. A Sur En è ina pitschna part dal camping stada sut l'aua. Er a Scuol tar la Serenera era l'aua ida sur la riva ora la dumengia. Las vischnancas da Scuol e Valsot han publitgà scumonds, las vias datiers da l'En èn per part stadas serradas or da motivs da segirezza, u ch'igl ha stgarpà davent la riva.
![Kantonnstrasse Engadin Unwetter](https://www.rtr.ch/static/cms/images/960w/1fc39a.jpg)
Il glindesdi na datti nagin privel d'aua gronda pli tenor la Confederaziun. Il livel da l'En n'è betg pli fitg aut.
Aua gronda chaschuna donns da plirs tschientmilli francs a San Murezzan
L'aua da Tegiatscha è creschida la dumengia suentermezdi sur la riva ora. L'aua gronda ha tranter auter donnegià la bavetta istorica, il «forum Paracelsus». In indriz istoric per tschiffar l'aua ch'è or da laina saja vegnì donnegià da l'aua, uschia ch'ins stoppia restaurar quest relict dal temp da bronz. Er vi da l'edifizi haja dà donns dad aua.
Ed er il center da sport Ovaverva è stà pertutgà dad inundaziuns, dentant saja la tecnica per gronda part vegnida schanegiada, scriva la vischnanca da San Murezzan en ina communicaziun. Mo la tecnica da las ruschneras haja gì donns. Sch'ins possia puspè avrir il center il mardi, na saja anc betg cler.
Ultra da quai èn dus autos en ina garascha sutterrana d'in hotel vegnids donnegiads, tut tschels autos hajan ins pudì salvar. Plinavant ha l'aua gronda tschufragnà ina garascha privata.
Pumpiers, polizia ed interpresas spezialas cun bunamain 100 persunas hajan pudì impedir ulteriurs donns. Uschia hajan ins pudì impedir inundaziuns tar la clinica Gut ed il center da bogns curativs. Ed er il provediment d'electricitad e d'aua n'è betg vegnì donnegià da l'aua. Il glindesdi eran en acziun singulas unitads dals pumpiers. Ils custs d'acziun ed ils donns vi d'infrastructuras da la vischnanca, d'interpresas e da persunas privatas muntian a plirs tschientmilli francs.
Persunas na sajan naginas vegnidas blessadas, sco che la vischnanca da San Murezzan ha scrit.