L'onn 2060 èsi radund 3 grads pli chaud en il Grischun, sche nus na vegnin betg da reducir las emissiuns. Tar quel resultat vegn in studi da Meteo Schweiz. Las consequenzas da quai stgaudament èn stads pli sitgas, plievgias pli intensivas, dapli dis da chalira ed envierns cun pli pauca naiv. Da quests effects fan insaquants pli fitg, auters main mal il venter a Rolf Hug, manader dals manaschis purils al Plantahof:
Aura extrema sco granella ma fa quitads. Quai n'enconuschevan nus quasi betg pli baud e granella è fitg privlusa per nossas cultiras».
Sa proteger pudessan ins cun raits sur las plantas, sco per exempel ils vischins el Tirol dal Sid enconuschan. «Quai pudess er daventar tar nus in tema».
In bun management d'aua
In auter tema che vegn a fatschentar è il management da l'aua. Cun lezza ston ins en il futur ir enturn pli spargnus. Sche quai dat l'enviern damain naiv saja da quintar la stad cun damain aua, uschia ch'ins sto sauar pli effizient. «Per exempel cun indrizs che dattan aua al terren e betg en l'aria, uschia è l'aua là nua ch'ella vegn duvrada». Er per las alps saja in bun management d'aua en il futur pli impurtant.
Plantas pli robustas
In'ulteriura pussaivladad per inscuntrar las sfidas dal stgaudament dal clima è, da plantar plantas pli robustas. En il Grischun vegn cunzunt cultivà pastg. Per il mument dat quai en blers lieus ina sort da pastg che porta bler retgav, ch'è dentant era sensibla. Pli adattadas e robustas sajan sorts che maschaidan per exempel pastg e traifegl.
La puma dentant na pateschia betg tant la midada dal clima, «nossa maila stuess supportar trais grads celsius dapli». E tschertas plantas lascha la midada da clima schizunt prosperar: Il vin Grischun vegn a vegnir anc megliers.
