La citad da Cuira vul vinavant installar la stanza da consum da drogas a la Sägenstrasse 75. Quai scriva la regenza en la resposta sin ina petiziun d'abitants ed abitantas da quest quartier.
Quella petiziun cun 205 suttascripziuns è vegnida surdada al cussegl da la citad ils 8 da mars. Las petiziunarias ed ils petiziunaris n'èn betg en general cunter ina stanza da consum da drogas, ma els giavischan in auter lieu.
Ils motivs principals dals adversaris per refusar ina stanza en il quartier d'abitar èn la vischinanza ad ina plazza da gieu e la tema da dapli criminalitad. Per la citad è il lieu dentant optimal, cunquai ch'el è datiers dal Stadtpark, ha avunda plaz ed è lunsch davent da scolinas e scolas. La regenza accentuescha dentant era che la votaziun dals 9 da zercladur n'ha da far nagut cun il lieu exact dal local, mabain mo cun la finanziaziun.