Davos l'explosiun ch'i ha dà l'emna passada en la scola Giacometti a Cuira pervia dad ina petarda stat in scolar da la scola superiura. Il delinquent ed il delict haja per gronda part pudì vegnir sclerì, communitgescha la polizia chantunala. Tar l'explosiun en il zuler da la scola suenter la pausa da l'avantmezdi eran vegnidas blessadas duas scolaras. 44 ulteriurs uffants avevan stuì vegnir tractads en l'ospital pervia da problems cun l'udida. Ils uffants en la chasa da scola eran vegnids tgirads dad in team da salvament e dal servetsch psicologic.
Plirs uffants sa blessads levamain
La mesemna avantmezdi è vegnì envidà ina petarda en la chasa da scola Giacometti. Pliras persunas han stuì vegnir intercuridas medicinalmain al lieu. Plirs uffants tranter 13 e 15 onns èn sa blessads levamain damai ch’ina petarda è vegnida envidada en il corridor enturn las 10:30 – gist a la fin da la pausa.
Ils uffants èn vegnids controllads d'in medi d'urgenza al lieu. Il sfrac haja surtut gì in effect sin l'udida dals uffants – i giaja en direcziun tinnitus. Tut en tut han 24 uffants stuì vegnir transportads en l'Ospital chantunal dal Grischun per ulteriurs scleriments. La gronda part haja dentant puspè pudì ir a chasa, uschia il pledader da la polizia chantunala, Markus Walser.
Suenter l'eveniment ha la polizia da la citad da Cuira ha segirà e bloccà il lieu. Ensemen cun la procura per giuvenils ha la polizia chantunala dal Grischun lura cumenzà cun l'inquisiziun.
Il cusseglier da la citad responsabel dat scleriment
Er il commember da la regenza da Cuira responsabel per las scolas, Patrick Degiacomi, è stà inquietà dal cas. Igl n'è er betg l'emprim cas sumegliant a Cuira. L'emprim hajan ins dentant vulì sa focusar sin ils scolars e scolaras, fertant che la polizia fa las inquisiziuns. Plinavant veglian ins analisar e valitar las reacziun da las autoritads e da la scola sin l'eveniment.
-
Bild 1 von 5. «Plirs uffants en sa blessads ed han in problem cun l’udida.» – Markus Walser. Bildquelle: RTR.
-
Bild 2 von 5. Bildquelle: RTR.
-
Bild 3 von 5. «Nus avain lascha controllar tuts che pudessan avair ina blessura entras il tun.». Bildquelle: RTR.
-
Bild 4 von 5. Bildquelle: RTR.
-
Bild 5 von 5. Bildquelle: Polizia chantunala dal Grischun.
Il manader da la scola na piglia per il mument betg posiziun. Quai ha el ditg sin dumonda da RTR. La polizia chantunala saja responsabla per la communicaziun, conferma il pledader da la polizia.
Segund incap entaifer d'in onn
Gia il mars 2024 avevi dà ina smanatscha d'amoc a la scola Giacometti a Cuira. Sco la Polizia chantunala aveva communitgà da lez temp, avevi dà in'annunzia pervi d'ina smanatscha scritta en ina tualetta da la scola – cun il text «Amoklauf 21.03.24». Da mezdi aveva la polizia pudì confermar che la situaziun na saja betg urgenta – uschia che las lecziuns da scola avevan gì lieu normal il suentermezdi.
Avant prest in'emna hai dà a la scola mercantila a Cuira ina smanatscha da bumba. La scola è vegnida evacuada.