En la chasa da scola Giacometti a Cuira hai dà oz avantmezdi in'acziun gronda da la polizia pervi d'ina smanatscha d'amoc.
Sco la Polizia chantunala communitgescha, hajan ins survegnì l'annunzia pervi da la smanatscha la bun'ura da las 8:00. En ina tualetta da la scola saja stà scrit «Amoklauf 21.03.24». La polizia haja serrà l'areal e tschertgà minuziusamain tut las localitads e las persunas preschentas. Radund 340 scolaras e scolars dal stgalim superiur sajan restads en las stanzas da scola durant l'avantmezdi. La scola haja adina puspè infurmà ils geniturs ed ils uffants ed endrizzà in lieu da rimnada.
Da mezdi haja la polizia pudì confermar che la situaziun na saja betg urgenta – uschia che las lecziuns da scola hajan lieu normal il suentermezdi.
-
Bild 1 von 2Legenda: Er l'entrada al plaz da scola via la storta Giacometti-Tittwiesen è vegnida segirada da la polizia. RTR -
Bild 2 von 2Legenda: Al lieu eran la Polizia chantunala sco er quella da la citad da Cuira. RTR
I sajan stads participads plirs tozzels policists da la Polizia chantunala e da la Polizia da la citad. La polizia intercurescha il cas.
Per Ursina Patt, la manadra da las scolas da la citad è l'eveniment anc ditg betg serrà giu.
Nus na savain anc betg tge ch'è damaun e nus na savain anc betg tgi che ha fatg quai. Ussa stuain nus intensivamain restar vidlonder e nus stuain era accumpagnar noss scolars e scolaras e las scolastas ed ils scolasts atras quai temp.
Las persunas d'instrucziun vegnian ad elavurar cun ils uffants la situaziun, uschia la manadra da scola. I saja uss impurtant da sclerir il cas e far attent ils scolars e las scolaras ch'els pon s'annunziar sch'els san dapli davart la smanatscha.