La gievgia suentermezdi hai dà a la scola da commerzi ed economia a Cuira ina smanatscha da bumba. La polizia è stada en acziun. La scola saja vegnida evacuada ed intercurida, ha la Polizia chantunala communitgà. Las 20:45 haja la polizia pudì dischavertir.
Curt suenter las 15:30 haja la Polizia chantunala survegnì per e-mail in avis sin ina smanatscha d'in attentat da bumbas. La polizia haja serrà il conturn da la scola da commerzi ed economia e la scola primara Nikolai. Radund 380 persunas, cunzunt uffants, sajan vegnidas evacuadas. La Grabenstrasse è stada bloccada en omaduas direcziuns.
Plirs tozzels forzas d'intervenziun sajan stadas en acziun da la Polizia chantunala e da la Polizia da la citad. Dus chauns detecturs d'explosivs dal Grischun èn vegnids sustegnids da dus chauns da Son Gagl. Er al lieu èn stads ils pumpiers ed il salvament da Cuira. La Procura publica e la Polizia chantunala dal Grischun investigheschan en chaussa.
-
Bild 1 von 2. Bildquelle: RTR.
-
Bild 2 von 2. Bildquelle: RTR.
Gia il mars avevi dà ina smanatscha d'amoc a la scola Giacometti a Cuira. Sco la Polizia chantunala aveva communitgà da lez temp, avevi dà in'annunzia pervi d'ina smanatscha scritta en ina tualetta da la scola – cun il text «Amoklauf 21.03.24». Da mezdi aveva la polizia pudì confermar che la situaziun na saja betg urgenta – uschia che las lecziuns da scola avevan gì lieu normal il suentermezdi.
Nagin trend da TikTok davos l’acziun
Tenor Anita Senti, la pledadra da la Polizia chantunala, haja quest cas da gievgia saira, sco era il cas dad avant in onn en la scola da Giacometti, nagin connex cun il trend dad amoc sin la plattafurma sociala TikTok. Là vai per ina sort cumprova da curaschi da scriver il datum dad amoc sin ina tualetta da la scola e lura publitgar quai sin TikTok. Sco Anita Senti conferma, pertutga quella problematica auters chantuns. Il chantun Grischun saja per il mument betg confruntà cun quest trend.