Ils 9 da zercladur 2024 ha las votantas ed ils votants da Cuira ditg «gea» ad ina stanza da consum. Suenter in lung vi e na duess quella avrir sias portas questa stad en il Welschdörfli. Là possian persunas dependentas consumar en in rom pli segir. Er il provediment da sanadad da basa fiss avant maun. Ma lez faschess schon uss basegns en il Stadtgarten, raquinta Reto Küng, il president da la baselgia refurmada da Cuira ed il medem mument vicepresident da l'Uniun d'agid Cuira.
Dapi intgins mais sustegnia la baselgia refurmada da Cuira e l'uniun d'agid Cuira, a Werner Erb e ses team. Quel s'engascha gia dapi passa indesch onns per las persunas en il Stadtgarten. I saja in engaschament incredibel, di Reto Küng. Mintga mesemna suentermezdi saja Werner Erb e ses team cun la gruppa da sunatibas en il Stadtgarten. Els sunian e portian er mangiativas e vestgadira. Uschia sajan ins vegnì a savair ch'i dettia problems tar il provediment medicinal da basa.
En cunvegnientscha cun Werner Erb veglian ins chattar ina soluziun per quai, enfin che la stanza da consum avra sias portas.
Las persunas en il Stadtgarten na van betg en ina pratica da medi u en l'ospital. Il tractament sto vegnir tar ellas.
En emprima lingia giaja per il tractament da plajas, e sche necessari er per dar antibiotica. Ma per quai dovrian ins persunas dal fatg. Ins haja contactà tut las instituziuns da Cuira che vegnissan en dumonda. Quellas laudian lur engaschament, sappian dentant betg porscher maun.
Nus avessan las resursas finanzialas ed administrativas per il project. Ma nus n'avain betg las persunas dal fatg cun savida medicinala. E quellas duvrain nus.
Perquai hajan la baselgia refurmada Cuira e l'Uniun d'agid Cuira scrit ina brev da lecturas en la gasetta «Südostschweiz» cun l'appel ch'ellas tschertgian persunas dal fatg. En il fratemp haja ins trais persunas interessentas ch'hajan experientscha da lavurar en la tgira. Proximamain hajan lieu discurs. Ed ins speria da pudair metter sin pes insatge ensemen.
Atgnamain haja ins vuli lantschar quest sustegn medicinal – che duess vegnir purschì enfin che la stanza da consum è avant maun – schon pli baud, surtut per surmuntar meglier l'enviern. En quest connex sajan ins stads in pau naìv, di Reto Küng. Ins haja duvrà dapli temp che pensà. Ed els hajan er percurschì ch'i na saja tuttina betg uschè simpel sco quai ch'els hajan pensà l'entschatta. Persuenter speran els ch'i giaja uss tant pli spert.
A partir dal mument che nus avain definitiv las persunas dal fatg che nus duvrain, crai jau che nus pudain metter en pes insatge entaifer da paucas emnas.
Engaschament social saja ina incumbensa impurtanta da la baselgia refurmada, di Reto Küng. A Cuira haja la baselgia refurmada in agen servetsch social che sustegna 70 enfin 80 persunas. Ed ins vesia che quai saja in basegns.
Atgnamain fissi l'incumbensa dal chantun da s'occupar da la situaziun da sanadad en il Stadtgarten? Sin quai prenda l'Uffizi dal servetsch social posiziun en scrit: Ins haja evaluà l'idea da porscher in provediment da basa medicinal avant lieu. Per la realisaziun n'haja ins dentant betg chattà il persunal dal fatg. Ed il chantun renda plinavant attent sin las streetworkers che sajan preschentas en il spazi public e che gidian en situaziuns d'urgenza.
La purschida medicinala da basa che la baselgia refurmada Cuira e l'uniun d'agid Cuira planisescha e che duess vegnir purschida enfin che la stanza da consum è avant maun, para uschia d'esser in schlargiament necessari per l'agid per las persunas dependentas en il Stadtgarten a Cuira.
Adattà al tema
Cuira vuless far frunt als problems da la scena da drogas averta cun in local da consum. Cunter quai hai er dà opposiziun. Sumegliant guarda or a Soloturn. Là han vischins cumbattì in tal local ils onns novanta fin davant il Tribunal federal. Oz però na bitta quest local betg pli grondas undas.