L'Allianza dal center e la Partida liberaldemocratica vulevan refusar il messadi enavos a la suprastanza per surlavurar. Quai tranter auter cunquai ch'ils custs sajan uss bunamain quatter giadas pli auts che oriundamain. E plinavant dettia er anc bleras dumondas avertas, spezialmain quai che pertutga la collavuraziun cun il Chantun e pertutgant la segirezza. Questa proposta è però vegnida refusada dal parlament cun 13 vuschs Na cunter 7 vuschs Gea.
La regenza da Cuira aveva argumentà ils custs pli auts tranter auter cun il fatg ch'il local stoppia esser avert pli ditg e ch'i dorvia uschia dapli persunal e mesiras da segirezza. Motiv saja ch'i na vegnia betg pli consumà heroin, mabain substanzas sin basa da cocain. Quellas na quieteschan betg, fan dentant pli agressiv. L'ultim pled en chaussa ha ussa però il pievel e quai il zercladur.
Project da pilot
Il local da consum surveglià è in project da pilot per trais onns che la citad da Cuira fa e finanziescha. Vitiers datti in post da cussegliaziun che stat sut il Chantun. Suenter la fasa da pilot duai il chantun decider da surpigliar l’entir local. Quai dependia dentant dals resultats.
