L'emprim schoc è passà, la trumpada anc betg dal tut magunada. Ma tuttina, dus trais dis per trair flad e metter a lieu il schabegià gidan magari. Sandra Maissen che n'è betg vegnida reelegida dumengia passada dal suveran da Cuira sco cussegliera da la citad ha prendì posiziun tar sia sconfitta e dà pled e fatg. RTR ha pudì discurrer cun la politicra da Cuira.
Sandra Maissen, co vai cun Vus, ussa trais dis suenter ch'il suveran da Cuira n'ha betg reelegì Vus en la suprastanza da la citad?
La trumpada è natiralmain anc adina qua. Jau hai però era survegnì blers resuns positivs e quai ma legra fitg. Nus avain fatg in cumbat electoral fair ed engaschà e natiralmain è adina tut pussaivel tar elecziuns. Sin basa da las prestaziuns e da quai ch'è reussì ils trais onns e mez passads avess jau entant bain spetgà da vegnir reelegida.
Co as declerais Vus questa sconfitta electorala?
Jau crai propi che la solidaritad tranter las partidas burgaisas n'ha betg giugà ed era las dunnas n'èn betg stadas propi solidaricas. Quai ha manà al resultat che nus n'avain nagina suprastanza burgaisa pli a Cuira ed era nagina dunna pli en la suprastanza davent da l'onn 2025.
Avant in'emna è vegnì preschentà in rapport da la cumissiun da gestiun ch'ha crititgà la suprastanza. Tenor il rapport avais Vus fatg sbagls en Vossa lavur. Ed il rapport discurra era da disfidanza en il gremi. Co e quant fitg ha quest rapport influenzà l'elecziun?
Igl è cler che quest rapport ed ils artitgels en ils meds da massa han influenzà l'elecziun. Era perquai che gea pir circa la mesadad da las persunas cun dretg da vuschar avevan da lez temp dà giu lur vusch. Discutabel è per mai era il mument il qual la cumissiun da gestiun ha publitgà il rapport. Uschè urgent n'è quel betg stà e jau hai per part era gì l'impressiun ch'i saja stà motivà politicamain. Jau stoss però era dir: Il resultat è cler e jau accept quel. Jau vegn era vinavant a m'engaschar per la citad, e sco deputada en il Cussegl grond hai jau uschia forsa era dapli temp da m'engaschar pli fitg là en il futur.
Ussa avais Vus gì temp intgins dis per far patratgs e per trair bilantscha. Avais forsa era ponderà tge che Vus sezza avessas pudì far auter?
Sbagls fa mintga carstgaun. Quai tutga latiers. Forsa avess jau en singuls cas pudì communitgar pli baud ed a moda pli activa. E lura sun jau ina persuna che vul svelt bler. Quai è era reussì, ma il sistem è stà dumandà fermamain.
Per finir anc: l'emprima stremblida è apparentamain istorgia, Vus restais engaschada e fidaivla a la politica ed essas da buna speranza. Tge vegn sco proxim?
Jau sun optimista. jau hai adina savì che quest mandat sco cussegliera da la citad vegn ad avair ina fin. Ussa è quella vegnida pli baud che spetgà, ma jau ma legrel sin novas sfidas en general, ma era sin quellas che spetgan sco politicra en il Cussegl grond.