La collavuraziun entaifer la suprastanza da Cuira n’è betg senza difficultads e la relaziun da confidenza è disturbada. Quai constatescha la cumissiun da gestiun en ses rapport. Quella aveva survegnì infurmaziuns il cumenzament d'avrigl che tschertas proceduras na sajan eventualmain betg vegnidas resguardadas.
La cumissiun da gestiun è vegnida a la conclusiun che las proceduras tar duas fatschentas en il departament da la cussegliera da la citad Sandra Maissen na sajan betg idas tenor las prescripziuns. Uschia saja per l'ina la via uffiziala per in supplement da funcziun da la direcziun interimistica per ils servetschs da construcziun auta betg vegnida resguardada. Per l'autra n'hajan ins per la successiun dal manader da la partiziun «Guaud ed alps» betg sa tegnì vi dal temp d'introducziun en la lavur – la cumissiun da gestiun ha constatà in temp da set mais enstagl da trais sco ch'igl era vegnì decidì en la seduta il settember passà.
Fatschentas sa retardeschan
Plinavant constatescha la cumissiun er ch'il clima da lavur saja responsabel che pendenzas na vegnian betg regladas a moda effizienta e retardeschia fatschentas. Quai haja influenza sin las prestaziuns da las collavuraturas e dals collavuraturs e per il clima d'ina part da l'administraziun da la citad. Ella recumonda a la suprastanza d’incumbensar ina firma externa. Quella duaja far in’enquista da persunal per pudair elavurar propostas adattadas fin la fin da l’onn.
Renfatschas in'emna avant las elecziuns
Che las renfatschas vegnan gist ussa, gnanc in'emna avant ch'il suveran da Cuira elegia ina nova suprastanza ed in nov parlament saja casualitad, ha ditg Jürg Kappeler, il president da la cumissiun da gestiun envers RTR. Il termin d'elecziun n'interesseschia betg la cumissiun da gestiun. Avant dus mais hajan els survegnì las infurmaziuns davart eventualas difficultads, lura duvrà in mais per elavurar la chaussa ed in ulteriur mais per sa procurar las posiziuns dals politichers pertutgads, uschia Kappeler plinavant. El speria ussa che quai che saja schabegià ils davos onns vegnia elavurà a moda solida, uschia ch'els possian prender mesiras per la nova legislatura.
