Dapi l'ultima revisiun da la lescha da scola èn bun 10 onns passads. Uss trametta la regenza en consultaziun divers puncts per adattar la lescha da scola. Tranter auter vul ella meglierar las pajas da la magistraglia, introducir l'obligatori da scolina u er adattar las classas cun sustegn spezial.
Augment da paja en la scola populara
In punct dispitaivel ils ultims onns èn adina puspè stadas las pajas da mussadras e scolastas da la scola populara. Il chantun Grischun ha numnadamain cumpareglià cun ils auters chantuns il pli bass nivel da paja. En spezial las pajas per mussaders e mussadras da scolina èn adina puspè stadas en la critica. Lezzas èn en Grischun 20% pli bassas ch'èn il chantun Sviz ch'ha il segund bass nivel da paja. L'Uniun da magistraglia grischuna LEGR è adina puspè sa dustada cunter las pajas bassas, quai er cun far plant. La Dretgira administrativa chantunala aveva dentant renvià quel.
Uss vul la regenza betg be auzar las pajas per mussadras da scolina mabain per tut la magistraglia ed adattar quella a la media dal nivel da paja dals auters chantuns da la Svizra Orientala. Quai cun la finamira da restar attractiv ed en concurrenza.
Cuntents cun l'auzament da paja
Exponentas ed exponents da la scola populara èn sin l'emprima egliada cuntents cun las midadas che la regenza propona. Tant Nora Kaiser, presidenta da la magistraglia grischunas sco er Silvio Dietrich, ch'è president dals manaders da scola, beneventan la maioritad dals puncts. Cunzunt l'augment da pajas saja necessari ed in levgiament. Tgi ch'è forsa pli pauc intgantads èn las vischnancas. Lezzas èn quellas che ston purtar ina gronda part dals custs en pli ch'i dat pervia dals augments da paja. Il chantun fa quint che quai sajan per onn 11 milliuns francs dapli.
Obligatori da scolina
Sper questa midada duai la scolina daventar obligatorica en il Grischun. Quai ch'è enfin qua betg stà il cas. Sco il chantun scriva è il Grischun il sulet chantun che n'enconuscha betg in obligatori da scolina. Quel vala be per uffants che dovran promoziun da lingua. En la pratica saja dentant uschia che 98% dals uffants en il chantun giajan a scolina.
Classa per sustegn spezial
Er en chaussas integraziun da scolaras e scolars prevesa la regenza da stgaffir la basa legala per uschenumnadas classas d'introducziun. Quai èn classas separadas per uffants ch'èn anc betg madirs per la scola primara regulara. Ils consorzis da scola pon sche necessari ma n'èn betg obligads da porscher la classa d'introducziun.
La consultaziun da la revisiun da la lescha da scola è fin la fin da november. Enfin lura pon partidas, uniuns etc. s'exprimer en chaussa.
