L’Uffizi per la scola populara ed il sport dat ora mintg'onn lubientschas spezialas per scolasts e scolastas che n'han betg in diplom per il stgalim sin il qual els dattan scola. Persunas cun in diplom per la scola primara dattan lura per exempel scola sin il stgalim superiur ubain mussadras da scolina dattan scola en in stgalim primar. Singulas lubientschas datti era per persunas che n'han insumma betg ina scolaziun pedagogica.
Mo grazia a lubientschas spezialas han chantun e vischnancas pudì garantir avunda magistraglia,
En il mument èn questas lubientschas fitg impurtantas per las scolas, era per pudair occupar tut las plazzas.
Tenor la manadra da l’Uffizi per la scola populara ed il sport ha il chantun per l’onn da scola 2023/24 circa 2'300 persunas d’instrucziun en la scola regulara. 462 da quellas han ina lubientscha per dar scola senza scolaziun adequata, 22 persunas n'hajan nagina scolaziun pedagogica. Quellas 22 persunas correspundan a totalmain set pensums cumplains.
La critica vers la qualitad da las lecziuns
Nora Kaiser crititgescha questas lubientschas e manegia che la qualitad en las scolas pudess daventar in problem, quai perquai che bleras persunas lavurian sin in stgalim sin il qual els n’han betg il diplom. Els sajan lura frustrads perquai ch’els na survegnian betg il salari per la lavur ch’els u ellas fetschian perquai ch’els n'hajan betg il diplom.
Savens avessan els u ellas la voluntad da far il diplom necessari, ma en las scolas ston las persunas d’instrucziun lavurar en in pensum fitg aut uschia ch’il temp na basta betg per la scolaziun.
Las mesiras dal chantun per garantir la qualitad
La manadra da l’Uffizi per la scola populara ed il sport manegia percunter che la qualitad possia vegnir garantida. Per l’ina capita quai cun sustegn dal team da scola e lur manader, ma era cun l'inspecturat e cun scolaziuns necessarias.
Era il chantun saja activ sin plirs livels: cun discurs persunals cun la direcziun, cun cussegls da scola e cun barats cun las associaziuns da scola, cun in portal online per las plazzas libras u era cun novs studis a la scola auta da pedagogia. In'ulteriur instrument per garantir la qualitad saja che la lubientscha vegnia be dada per 1 fin 3 onns. Plinavant stoppian las persunas avair ina scolaziun pedagogica sumeglianta ed esser adattadas per pudair dar scola.
Il sistem n'è betg simpel, nus stuain tuts e tuttas sa gidar. La scola è era tenor lescha in pensum da chantun e vischnanca.
Ina situaziun difficila
Nora Kaiser sco era Chantal Marti-Müller manegian ch'i saja vegnì pli pretensius da chattar scolasts e scolastas. In motiv perquai saja er la situaziun linguistica e la geografia da noss chantun. Era l’Uffizi da scola e sport saja pertschert ch’i dat in basegn d’agir pertutgond la recrutaziun da scolasts e scolastas. El fetschia ses pussaivel per meglierar la situaziun, er en collavuraziun cun las vischnancas e las partidas cumpigliadas.
Chantal Marti-Müller manegia dentant, ch’i saja simpel da mo crititgar. Meglier fiss dentant sch’il LEGR giaja ordavant cun in bun exempel per motivar scolasts e scolastas futuras. La finamira saja gea la medema, da dar ad uffants e giuvenils la pussaivladad d'emprender e da sa sviluppar. Era Nora Kaiser è da questa opiniun, ha dentant il giavisch che la lavur da la magistraglia vegnia appreziada pli fitg.