Regalar enstagl da bittar - Quai schabegia cun las 900 plantas suenter il WEF

Per il forum economic mundial WEF vegnan mintg'onn furnidas, fabritgadas, demontadas tonnas da material a Tavau. Per che var 1'500 objects na vegnan betg simplamain bittadas davent, s'engascha l'organisaziun d'ambient GreenUp.

GreenUp rimna las las restanzas e parta ellas a Tavau – gratuit u cunter ina pitschna donaziun. 900 plantinas, chandailas, mobiglias e perfin ina bar da sis meters lunghezza hai dà quest onn. Quel ha chattà in nov da chasa sin il Weissfluhgipfel sur Tavau. In'entira tribuna ch'era l'emna passada en il center da congress è vegnida transportada en l'aula da la scola a Tusaun.

Quels e quellas da Tavau han pudì ir per objects pli pitschens quest'emna. Ils indigens che ston purtar ils dischavantags dal WEF duain profitar. La gestiunaria da GreenUp Nicole Keller di: «Uschia na pon betg be las plantas viver vinavant, e las mobiglias na bittadas davent, mabain uschia pon ins er evitar millis kilos d'emissiun da CO2.»

In dagut sin il crap chaud?

La persistenza dal Forum economic mundial è mintg'onn in tema. Ina interpresa da cussegliaziun ollandaisa e Greenpeace han retschertgà il 2022 tge influenzas ch'il WEF e ses participants han sin l'ambient. En tut èn vegnids colliads 500 sgols cun jets privats cun il WEF ch'hajan chaschunà 7'400 tonnas emissiuns da CO2.

L'acziun da GreenUp duai tenor Keller spargnar circa 25 tonnas, ina part da l'acziun. «Cumpareglià cun ils sgols ed ils jets privats è quai in dagut sin il crap chaud. Tenor mai èsi dentant impurtant da mussar ch'ins po far uschia insatge, ch'ins po pensar a l'economia circulara.»

Il WEF sustegna l'organisaziun da l'ambient

Cun la repartiziun da las restanzas vul l'organisaziun d'ambient metter in segn. In che mussa tge che l'economia circulara vul dir. Il WEF sustegna GreenUp, igl n'è però betg il sulet ch'els fan per dapli persistenza. Nicole Keller: «Els investeschan per exempel en indrizs fotovoltaics locals. I dat pliras chaussas ch'il WEF fa.» Plinavant emprova il WEF da consumar damain plastic da diever unic e pupi, metta il focus pli fitg sin tschaveras localas e stagiunalas e porscha bigliets da tren favuraivels. Part al forum fan er differentas NGOs. Uschia er GreenUp che vul tut anc regalar fin venderdi saira.