Forum mundial d'economia - Adversaris dal WEF han bloccà via e demonstrà

Il Forum mundial d'economia a Tavau duai surpigliar responsabladad per il clima. Cun questa pretensiun centrala ha l'allianza «Strike WEF» era quest onn organisà ina spassegiada da protest encunter il WEF. Durant dus dis ha la spassegiada manà tut en tut 25 kilometers da Küblis a Tavau.

Polizia stauscha demonstrants giu da via

La dumengia suentermezdi ch'ils demonstrants èn arrivads avant Tavau hai dà in caos da traffic cun temp da spetga da passa in'ura. I haja dà colonnas d'autos da Tavau Laret enfin a la cruschada d'ir al transport d'autos dal Vereina. Da tschella vart eri colonna fin al Lai da Tavau.

Duas giadas haja la polizia supplitgà las persunas d'ir ord via e mintgamai dà ina limita da 10 minutas. Quels avertiments sajan dentant vegnids ingnorads, perquai haja la polizia stuschà ils demonstrants giud via. Quai ha declerà ina pledadra da la Polizia chantunala grischuna envers l'agentura da novitads Keystone-SDA.

Tura da protest encunter il WEF

Radund 350 persunas èn s'entupadas la sonda avantmezdi a la staziun da Küblis. Dus bus han schizunt purtà var 100 persunas da Berlin. L'emprima etappa ha manà fin a Claustra, la segunda etappa da la dumengia maina da Claustra fin a Tavau Plaz.

Ils participants e las participantas derivan oravant tut da la Svizra e da la Germania. Dentan han era persunas da la Belgia, il Portugal, l'Engalterra e perfin da Peru chattà la via en il Partenz. Sin las tablas ed ils transparents èsi scrit slogans sco «Burn the system», «viva l'anarchia» u «eat the rich».

Cun il dumber da participants e participants sajan els cuntents, hai gì num davart ils organisaturs. Ils dus onns passads han ils demonstrants stuì guntgir sin sendas da viandar da la vart, quai perquai ch'il chantun n'aveva betg dà la lubientscha dad ir sin la via chantunala. Encunter quella decisiun han ils organisaturs sa dustà davant il Tribunal federal e survegnì raschun l'atun passà.

Spassegiada da protest

Era cuntents è «Strike WEF» ch'els na ston betg prender il tren per l'ultima part da la spassegiada, pia tras Tavau. Ils ultims trais onns han els stuì prender il tren enfin en il vitg. Quest onn pon els ir a pe fin a Tavau Plaz.

Demonstraziun encunter il WEF a Tavau Plaz

La dumengia, curt avant l'entschatta dal WEF ha er la Juso Svizra clamà ad ina demonstraziun a Tavau Plaz. Quai sut il motto «Smash WEF – Fight for our Future». Ensemen cun la GSoA, la chauma da clima, Strike WEF ed auters ha la Juso auzà la vusch encunter «l'inscunter internaziunal da lobby e dals capitalists».

Che la demonstraziun haja cumenzà en rom pitschen cun be radund 30 participantas e participants haja da far cun il temp dad oz cun las nundumbraivlas pussaivladads da far palais sia opiniun. Ils giuvens socialists han pretendì ina fin dal forum. Ils ritgs e las pussantas inciteschian la crisa da clima, las guerras e l’ingiustia cun lur engurdientscha da gudogn, hai gì num en ina communicaziun da la Juso.

Pli tard è lura era la colonna da «Strike WEF» arrivada ed ha augmentà il dumber da demonstrantas e demonstrants sin radund 300 persunas.

Ils demonstrants han era fatg reclama per lur «iniziativa per in futur». Cun la taglia sin l’ierta che saja planisada en l’iniziativa duain quels ussa vegnir dumandads ils ritgs e pussants a cassa per lur crims dal clima. Ins veglia uschia prender enta maun sez il futur.

Demonstraziun nunlubida a Berna la sonda

Er a Berna hai dà manifestaziuns encunter il Forum mundial d'economia. Tschients persunas èn sa rimnadas la sonda sin la plazza federala ed èn idas tras la citad. La demonstraziun n'è betg stada lubida. Sco la Polizia chantunala bernaisa scriva sin X haja dà donns materials e persunas hajan dà fieu a pirotecnica. Perquai è la cauma vegnida accumpagnada stretg da la polizia, suenter in'ura ha la polizia intimà las demonstrantas ed ils demonstrants da schliar la manifestaziun, quai ch'è lura er capità.