La Viafier retica vul far adattaziuns vi da ses plans da reducir la purschida ch'ella aveva publitgà il schaner pervi dal manco da persunal. Quels plans avevan procurà per ferma critica, tranter auter da las regiuns pertutgadas, dentant er or dal Cussegl grond.
Il directur da la Viafier retica, Renato Fasciati, ha confermà envers RSI ils plans d'adattaziun: Co questas adattaziuns vegnan a vesair ora concret, na possia la RhB anc betg communitgar, ha ditg Fasciati. Singuls puncts stoppian ins anc sclerir, silsuenter vegnian sco emprim las regiuns infurmadas.
La Viafier retica aveva annunzià pliras midadas. Tranter auter ston passagieras e passagiers sin il tschancun Scuol-Landquart midar tren a Sagliains, e tranter Filisur e Tavau sco era tranter Glion e Mustér curseschan per part bus da remplazzaments.
Envers RSI ha il directur da la Viafier retica ditg: «La Viafier retica lavura intensivamain ensemen cun il chantun, nus avain udì tuttas vuschs e nus faschain tut per che l'effect sin las passagieras ed ils passagiers è uschè pitschen sco pussaivel.»
