Gievgia passada ha la Viafier retica communitgà ch'i vegnia a dar midadas tar intgins trajects pervia da la mancanza locomotivistas e locomotivists. Concret adattescha la VR sia purschida e remplazza tranter auter differents trens cun bus a l’ur da l'urari. Era pertutgada da questa mesira che dura a partir dals 11 da mars 2024 fin tar la midada d’urari 2025: il traject tranter Tavau e Filisur. Betg pertutgà da la mesira è il tren nostalgic che cursescha mintgamai la stad sin il traject.
Cuminanza d'interess lantscha petiziun
Ed exact quest traject procura per critica ed uschia per ina nova cuminanza d’interess (CI): «Stopp öV-Kahlschlag für einheimische – Gegen die 9-monatiga Einstellung der RhB-Line Davos-Filisur». En ina communicaziun scriva quella ch’ins haja lantschà ina petiziun cun il medem num e (stan 29 da schaner) 125 suttascripziuns a l’adressa dal directur da la viafier, Renato Fasciati. La CI crititgescha che la mesira per il traject tranter Tavau e Filisur saja «surproporziunala». Il traject na saja betg adattà per ils bus da remplazzament pervi dal viadi pli lung. Plinavant crititgescha la cuminanza ch’il tren da pendularis vegnia remplazzà per nov mais, entant ch’il tren nostalgic curseschia vinavant sco purschida turistica. La CI pretenda perquai da porscher la damaun e la saira mintgamai duas colliaziuns da pendularis en tuttas duas direcziuns.
Reducir il temp da lavur
Tenor communicaziun da la VR duessan durant la stagiun morta (11 da november fin 10 da matg e 28 october fin 14 da december) tut las colliaziuns tranter Filisur e Tavau vegnidas remplazzadas cun bus. Durant il temp da stad circuleschan tranter sis e diesch trens ed a l’ur da l’urari puspè bus. Las mesiras sajan necessarias per impedir che trens crodian or a curta vista, ha la VR fatg a savair en sia communicaziun. Uschia possian ins reducir il temp da lavur per locomotivistas, quai en cunvegnientscha cun chantun e Confederaziun.
Il Telesguard ha rapportà da las mesiras:
