La Viafier retica remplazza tranter auter differents trens cun bus pervi da la situaziun da persunal tendida. I mancan locomotivistas e locomotivists, scriva la Retica. La dumonda da la clientella saja uschè gronda sco anc mai, ma il persunal na tanschia betg per tut las colliaziuns da tren.
Uschia vegnan sin differentas lingias en il Grischun ils trens remplazzads cun bus, quai da temps a l'ur da l'urari:
- sin il tschancun tranter Glion e Mustér
- sin il tschancun tranter Cuira ed Arosa
- sin il tschancun tranter Tavau e Filisur
- per ir da Landquart a Scuol ston ils passagiers e las passagieras midar tren a Sagliains
- il tren d'aventura tras la Ruinaulta vegn stritgà
Las mesiras muntan che 3% dals trens vegnan remplazzads cun bus. Las midadas valan a partir dals 11 da mars.
Regiuns na van insumma betg d'accord
Tenor il mainagestiun da la regiun Engiadina Bassa Val Müstair, Rico Kienz, hajan ins bain chapientscha ch'i dovria mesiras pervia da la mancanza da persunal. I na possia però betg esser che las regiuns perifericas vegnian chastiadas cun stritgar colliaziuns directas entant ch'i vegnian introducidas en l'intern dal chantun las colliaziuns da mes'ura.
Plinavant na porschia Sagliains betg l'infrastructura adattada per spetgar sin il proxim tren ed il temp per midar sin ils bus da posta a Scuol vegnia pli curt. Quai chaschunia stress supplementar e saja ina perdita da confort tant per ils indigens sco er per ils giasts. La chaussa vegnia tematisada en la proxima seduta da presidents e presidentas communalas da la regiun. Lura spera Rico Kienz ch'els possian ir cun ina tenuta coordinada vers la Retica ed uschia evitar che la mesira giaja en vigur.
Era autras regiuns sa sentan exclusas
Tenor il directur da turissem d'Arosa Roland Schuler è la decisiun stada ina surpraisa ed ins saja trumpà. Il viadi a Cuira en in bus saja numnadamain pli stentus ch'en il tren. Era a la regiun da Filisur fa l'alternativa mal il chau. Il traject da Tavau dura cun il bus passa 54 minutas, di Luzi Schutz, il president communal. Quai saja radund ina mes'ura dapli viadi.
Ensemen avessan nus pudì chattar meglieras soluziuns.
Ins avess giavischà da vegnir inclus en la tschertga da soluziuns, van tuttas regiuns d'accord. Uschè avess ins pudì evitar per exempel da stritgar en Surselva colliaziuns impurtantas per il turissem da stad, di Roger Tuor, mainagestiun da la regiun. Cunzunt il tren d'aventura u il transport da canus tras la Ruinaulta manchian presumablamain enfin in december 2024. Il pli tard enfin lura duai il manaschi regular esser puspè garantì, uschè vul quai il chantun.
Il chantun pretenda da la Viafier retica ch'il manaschi turna al status quo avant la stagiun d'enviern 24/25.
La Viafier retica e conscienta da la dischillusiun. D'includer las regiuns oravant na saja dentant betg stada in'opziun che maina ad ina soluziun, di Simon Rageth. Tscherts trajects sajan bain pli stentus, il pledader da medias relativescha però ch'ins possia uschia segirar las colliaziuns e l'urari. La data dals 11 da mars è vegnida definida conscientamain. Lura cumenza tenor la Viafier retica la stagiun bassa, per singuls eveniments possian ins anc adina adattar ils uraris.
Mancanza da persunal sforza a midadas
Per proteger il persunal sco er evitar che trens crodan or a curta vista ha la Viafier retica decis da far questas midadas ed uschia reducir las uras da lavur per locomotivistas e locomotivists, quai en cunvegnientscha cun chantun e Confederaziun. Ussa ha la Retica la lubientscha da punctualmain far midadas dals ils 11 da mars fin a la midada sin l'urari 2025 che succeda il december 2024. Sche la situaziun da persunal lubeschia possian las mesiras er vegnir adattadas pli baud.
La situaziun tendida tar il persunal da locomotiva è gia pli ditg in tema. Gia l'onn passà aveva l'interpresa fundà ina taskforce che s'occupa dal tema recrutar e scolar persunal. Malgrà las mesiras hajan ins anc memia pauc persunal da locomotiva. Sco la Retica scriva, hajan els actualmain 280 locomotivistas e locomotivists, quai sajan 15 memia pauc. Pervia da persunal betg scolà, fluctuaziun da persunal e dapli cas da malsogna a lunga durada na tanschia quai betg. Ils responsabels èn però optimistics che la situaziun sa meglra puspè. Actualmain èn 24 persunas èn scolaziun e plirs tozzels entrian en il decurs da l'onn en scolaziun.
