Per proteger ils amfibis vegn tschentada sper via ina folia da plastic verda. Quella vegn fermada cun fier en il terren, uschia che las raunas pon ir sur via vi. Quai declera Renata Fulcri, da l'uniun Bigra, che s'engascha per la protecziun d'amfibis. Ma be cun ina barriera na saja quai betg fatg. Ils amfibis stoppian gea er anc vegnir sur la via ora. Quai garanteschian els cun in sistem simpel.
Mintga 25 meters è ina sadella chavada en la terra. Là crodan ils amfibis en e nus pudain purtar sur via e laschar liber els là.
L'uniun ha installà sadellas en la terra, nua ch'ils amfibis crodan en. Questas sadellas vegnan purtadas sur la via or ed ils animals vegnan laschads libers lda tschella vart. Durant il temp da scola portan ils uffants da scola d'Almens ensemen cun las persunas d'instrucziun ils amfibis sur via. Gia Giancarlo Lötscher, president da la secziun da chatschaders Raschil, dastgava far quai cura ch'el gieva sez anc a scola. Oz è el responsabel che tut quai gartegia.
Tals projects da gidar ils amfibis datti en il Grischun circa 25, per exempel tranter Rueun e Tavanasa u er en il Mesauc. Quai saja be pussaivel perquai che var 80 persunas en tut il chantun sustegnan cun far lavur voluntaria.
Co po in e mintgin proteger rustgs e raunas?
Tuttas e tuts possian gidar. Uschè pitschnas sco ils animals sez possian er esser nossas acziuns en il mintgadi, di Renata Fulcri da la Bigra.
Nus tuts pudain promover il mantegniment da las spezias d'amfibis cun pitschnas mesiras.
- Prender resguard sin via: Cura ch'igl è bletsch duai ins ir in pau pli plaun e guardar sch'i ha rustgs e raunas sin via. Surtut sch'ins vesa sper via tavlas cun raunas.
- Disurden en curtin: Amfibis sa sentan protegids en il disurden e passentan là lura il temp d'enviern.
- In'ulteriura mesira da protecziun è da montar ina cuppa d'aua per ils insects en l'iert.
- Ed il pli impurtant: tar amfibis morts sin via duain ins far ina fotografia ed annunziar questa scuverta a la Bigra per che lezza po eventualmain prender mesiras da protecziun.