La sanaziun da la via chantunala tranter Rueun e Tavanasa è en plaina lavur. Enfin il 2025 duessan las lavurs esser a fin. Sur tschintg kilometers s'extenda la sanaziun, e da quai èn quasi trais kilometers predestinads per ils rustgs da traversar.
Baud la primavaira vegnan els or dal guaud per ir en direcziun Ogna da Pardiala, in paradis che serva sco plazza da frega. Blers da quests rustgs survivan dentant strusch il viadi sur la via chantunala. Vegn vitiers che durant la stad ed encunter l'atun returnan blers puspè en il guaud, pia han ils rustgs en tut dus viadis privlus. En connex cun la sanaziun da la via ha il chantun decidì d' integrar 31 vials sutterrans. Ina sort tunnel per amfibis. Quels pon uschia traversar la via cura e co els vulan, e quai senza il ristg da vegnir smatgads plats.
Cun survegliar via video avain nus pudì controllar schebain ils vials funcziunan. Nus essan stads surstads, tut tge animals che fan diever da questa pussaivladad.
La sanaziun da l'entira via custa 24,7 milliuns francs, e radund 10 pertschient da quels èn reservads per la protecziun d'amfibis. En il Grischun è questa via la pli lunga passascha cun uschè blers vials d'amfibis. Il lieu en vischinanza da l'Ogna da Pardiala vala sco in dals lieus cun blers rustgs brins, in animal che saja uschiglio daventà adina pli rar. Grazia als vials speran ils responsabels da l'Uffizi per l'ambient e la natira dal Grischun che la populaziun da rustgs brins, raunas e piutschas cotschnas sa revegnia ils proxims onns puspè en quest territori.