La citad da Cuira ha l'onn passà puspè fatg in gudogn. Cun in plus da 10,1 milliuns francs serra il quint per 7,6 milliuns francs meglier che budgetà. Las expensas èn stadas tar 296,7 milliuns, quai è in zic dapli che previs, oravant tut ils custs da persunal sajan stads pli auts, scriva la citad.
La citad ha gì 9,3 milliuns francs dapli entradas che budgetà. Per l'ina haja dà dapli entradas da taglia (+4,3 miu), per l'autra saja era il retgav finanzial stà pli aut (+3,5 miu). La citad ha pia per exempel survegnì dapli tschains che spetgà.
Cuira ha l'onn 2024 investì passa 86 milliuns francs. Ils dus projects gronds «Chasa da scola Fortuna» e «Eisball» contribueschan a passa la mesadad da las investiziuns. La chasa da scola custa 36,5 milliuns – ed il project per sport da glatsch e sin pastg munta a 11,9 milliuns francs.
