La citad da Cuira ha preschentà in preventiv quasi guliv per il 2024. Las expensas muntan a radund 295 milliuns francs, las entradas duain esser levet pli autas. La citad possia mitigiar actualmain ils effects da la chareschia cun dapli entradas da taglia e schliar ulteriuras amortisaziuns.
Nus constatain la chareschia e pudessan budgetar bler meglier, sch'ils facturs fissan uschia sco avant 2 onns.
La finala quinta la citad cun in gudogn da circa 1,7 milliuns francs. Quai è radund 1 milliun dapli che l'onn passà. Il president da la citad da Cuira, Urs Marti, quinta cun cifras nairas, dentant simpel na vegnia betg. Sper bleras investiziuns vegn persunal a custar 4,3 milliuns francs dapli che l'onn passà (2,5 milliuns da quai pervia da la chareschia).
Il 2024 prevesa Cuira investiziuns nettas da passa 87 milliuns francs. Radund 17% po la citad finanziar sezza. Il rest stoppia vegnir finanzià cun daners esters. Il project cun ils pli auts custs è l'implant da scola e sport Fortuna che custa il 2024 passa 37 milliuns francs e total bunamain 100 milliuns.