Las entradas e las expensas muntan a 283,5 milliuns francs. La citad da Cuira quinta cun in gudogn da 247'500 francs, communitgescha la citad. L'onn avant eri anc 1,3 milliuns. Cumpareglià cun il budget 2022 creschan las expensas per radund 11,8 milliuns francs (+4,4%) e las entradas creschan per 10,8 milliuns francs (+4%). Uschia è il resultat dal budget 2023 per 1 milliun francs pli bass.
En spezial vegn quintà ch'ils custs da persunal creschan e ch'i dat pli auts custs da material e gestiun, sco er tar ils custs da transfer. Sin la vart da las entradas quinta la citad cun 2,8 milliuns francs dapli entradas da taglia e pli auts salaris.
Plirs projects gronds e da generaziun
L'onn proxim èn planisads plirs projects da generaziun e projects gronds. Las investiziuns nettas muntan a 76,8 milliuns francs. La pli gronda part va en las plazzas da scola e sport a la Ringstrasse cun 32,2 milliuns francs. 3,7 milliuns van en la chasa da scola a Haldenstein, 2 milliuns per il project «Mehrwerk» (cumpra da la citad), 2 milliuns per la sanaziun da la chasa da scola Maladers e 5 milliuns per ina contribuziun da finanziaziun da «IBC Energie Wasser Chur». Las investiziuns nettas pon per 17,2% vegnir finanziadas sezzas.
En connex cun la strategia d'investiziun èn previs 206 milliuns francs per la perioda da 2020 fin 2023.
Quint annual da l'onn 2021
La citad da Cuira ha fatg l’onn passà in surpli da 23,7 milliuns francs. Quai tar entradas da bunamain 298 milliuns francs. Cun quest resultat surpassa la citad il preventiv per passa 13 milliuns ed il resultat da l’onn avant per 10 milliuns francs. Cunzunt sajan las entradas da taglia stadas pli autas che previs, ha communitgà la citad da Cuira.
