Luana Bergamin politisescha per l’Allianza dal Center. Sa decidida da far politica saja ella avant in onn a chaschun da la sessiun da dunnas. Selina Nicolay appartegna a la Partida socialdemocratica. Gia da giuvna eria cler per ella, ch’ella giaja in di en la politica.
Tge pon ins emprender dal sport u d'ina chamona?
Tge pon ins emprender dal sport per far politica? Insatge dal pli emprim ch’ella haja emprendì cun far sport saja da perder – e lura puspè star si ed avair finamiras, di Luana Bergamin ch'è ida cursas da skis da FIS. Ins perdia gea pli savens che quai ch’ins gudognia. Tuttina stoppian ins cuntinuar.
Perder e puspè star si ed avair finamiras.
E tge pon ins emprender sco guardiachamona per la politica? Selina Nicolay vesa davent da sia chamona Munt da la Bês-cha co ch’ils glatschers lieuan. La chamona sto quest onn spargnar aua tge che n'era fin uss mai il cas. Perquai èsi cler ch’ella vul s’engaschar per clima ed ambient.
La chamona sur Puntraschigna è autarca ed independenta da la rait da current. Ins vesia uschia ch’i dettia era autras soluziuns sin il champ d’energia.
I dat autras soluziuns che dad esser dependent da gronds concerns dad ieli e gas.
