Dapi trais dis sesan la socialdemocrata Selina Nicolay e Luana Bergamin da l’Allianza dal Center uss en il Cussegl grond. Duas dunnas, duas partidas, ed ellas han ina finamira – ellas vulan puspè turnar.
Per Selina Nicolay è la saramentaziun stada in mument fitg spezial, ella saja stada gnervusa ed emoziunala. Entant ha ella gia fatg in’emprima dumonda a la regenza. La fracziun da la PS haja decis ch’i saja fitg impurtant, ch’ils novs e las novas vegnian a prender posiziun fitg svelt.
Per mai era l’ura da dumondas in bun lieu per entschaiver.
Er Luana Bergamin è s’installada amez sias collegas da l’Allianza dal Center. Tut saja fitg interessant, ma da stuair seser uschè bler è ina sfida per l’anteriura sportista. En il temp liber è ella offensiva sin il velo – in zic pli defensiva è stada si’entschatta en il Cussegl grond.
Il mument vuless jau simplamain ina giada guardar, tadlar. Ed jau na sun betg quella che va qua viaden e di, uschia faschain.
Las duas novizas da duas partidas han ina finamira – ellas èn vegnidas per tunar adina puspè!
