Ina biodiversitad intacta saja chapital natural è part centrala da la ritgezza dal Grischun. Per proteger questa biodiversitad per las generaziuns che suandan ha il chantun uss deliberà ina strategia fin l'onn 2032. Quai ha la regenza grischuna communitgà.
Las proximas generaziuns dal chantun duaian avair ina biodiversitad ch'è ritga e resistenta – restistent'avunda per tegnair cunter las sfidas che la midada dal clima po purtar e per garantir il nutriment. L'emprima fasa da realisaziun – che dura dal 2023 fin il 2028 – custa passa 45 milliuns francs. Quai senz'ils custs da persunal, sco il chantun ha communitgà. El vesa il project sco investiziun cun plivalur.
Jau speresch che noss biadis possian dir ina giada ch'igl è reussì al chantun d'unir a temp sias forzas per ch'il Grischun resta ina metropola natirala.
Deficits davart la biodiversitad
La biodiversitad en la Svizra n'è betg cuntentaivela , ha la regenza communitgà. En il Grischun haja la biodiversitad anc adina ina relativ buna qualitad. Tuttina ha in rapport da l'onn 2022 mussà ch'i dat cunzunt deficits ecologics tar ils biotops d'aua sco er en zonas d'autezza e zonas ch'han cundiziuns favuraivlas per la producziun. Ils effects da la midada dal clima sa mussian er pli e pli.
