«L’uman è cumplainamain dependent da las resursas e contribuziuns che la biosfera porscha.» Uschia cumenza il rapport da la situaziun da la biodiversitad che l’Uffizi federal d’ambient ha preschentà a Berna. E qua valia che la qualitad e stabilitad da las prestaziuns dal sistem ecologic sajan meglras pli auta che la diversitad biologica saja. Pia è la biodiversitad ina impurtanta part per il bainstar dals umans.
La Confederaziun ed ils chantuns han rinforzà lur stentas per mantegnair la biodiversitad ils ultims onns. Quai ha er purtà success locals, ma quai na tanschia betg. Tut ensemen è la biodiversitad en Svizra en schletta cundiziun. Il provediment da las resursas n’è betg pli garantì a lunga vista.
Spezias
Per in terz da las spezias che vivan en la Svizra è la situaziun precara, ellas valan sco periclitadas u schizunt en privel da svanir. Che be paucas spezias èn svanidas saja grazia a las mesiras per proteger abitadis, promover las spezias e da nizzegiar il terren pli persistent. Ma tuttina èn bleras spezias vi da perder populaziun.
Entant che spezias frequentas ch'han be pitschnas pretensiuns ecologicas èn vi da prosperar stauschan quellas davent ils spezialists. Uschia sa derasan cunzunt las sorts che han gugent chaud. Per exempel datti dapli plantas en las Alps perquai ch’ellas pon crescher pli aut. Quai lascha dentant pli pauc plaz per las spezias che prefereschan fraid.
Mantegnair e promover
L’onn 2011 è la lescha per la protecziun da las auas vegnida revedida. Quella prevesa che la funcziun natirala dals auals e flums vegnia reconstruida. Dal 2011 fin 2019 èn 156 kilometers auas currentas vegnidas revitalisadas. Senza quai ed autras stentas fiss la situaziun da la biodiversitad bler mendra.
Ils territoris da protecziun da muntada naziunala, regiunala e locala cuvran 10,7% da la surfatscha dal pajais. Latiers vegnan 2,7% ch’èn custaivlas per la biodiversitad en autra moda. Quai resulta a 13,4% da la surfatscha da la Svizra che contribuescha al mantegniment da la biodiversitad. La finamira ch’era definida è uschia manchentada per lunsch, quella era da segirar fin il 2020 17% da la surfatscha per la biodiversitad.
Crititgà vegn era l’implementaziun. Previs era da realisar enfin la fin dal 2020 83% dals objects. Dentant eran 2021 be 17% dals objects finids. 8% èn en in stadi avanzà. La finamira è pia manchentada per 75%.
I dovra ina midada
La midada po be gartegiar sche l’infrastructura ecologica vegn mantegnida e sviluppada e sche l’ambient vegn nizzegià cun respect per la biodiversitad. Perquai ha il Cussegl federal deliberà in pachet da mesiras per in’agricultura persistenta. El ha era fatg ina cuntraproposta a l’iniziativa da biodiversitad. Cun ils manaschis da viafier ha el concludì finamiras per la biodiversitad. La biodiversitad è era part da strategias per il turissem e per la sanadad ed era dal concept da cuntrada da la Svizra. Decisiv è uss che quai vegn mess en la pratica, scriva il BAFU en ses rapport.
Or da l'archiv: