Circa 3'000 pèra chalzers da muntogna e da raiver reparan Orlando e Leonia Rada ensemen cun lur team mintg'onn en lur lavuratori a Le Prese en il Puschlav. Uschia na dat lur interpraisa New Rada betg mo ina segunda vita a chalzers, mabain stgaffescha era plazzas da lavur preziusas en ina regiun periferica. Els vegnan undrads quest onn cun il Prix Montagne ch’è dotà cun 40’000 francs.
Lavur manuala d’auta qualitad
Dapi 30 onns mainan Orlando e Leonia Rada la fatschenta da famiglia. Lur finamira saja adina stada da pinar sche pussaivel in chalzer enstagl da bittar davent quel. A Le Prese arrivan mintga di per posta dunsainas da chalzers da muntogna e da rampignar da tut la Svizra. Ensemen cun lur trais collavuraturs emprova el da reparar quai ch'ins po anc reparar. Sper il lavuratori a Le Prese mainan els era anc ina butia cun in pitschen lavuratori visibel a Puntraschigna.
Premi dal public per Zauberwald a Lai
Il premi dal public è dotà cun 20’000 francs e va quest onn al team dal Zauberwald a Lai. Il festival dal guaud magic ha lieu mintg'onn durant circa 18 dis il december, avant Nadal – quest onn gia per la indeschavla giada. Sper ils concerts e las purschidas culinaricas carmalan cunzunt las installaziuns da glisch singularas ils osps en il guaud tranter Valbella e Lai. Ina part da las 16 installaziuns d'art producescha l’equipa dal festival sez. Dasper envida ella mintg’onn artistas ed artist da la Svizra e da l'exteriur che preschentan lur ovras d'art. Ultra da quai han era scolaras e scolars da Lai mintg'onn la pussaivladad da crear insatge per il guaud magic.
Creaziun da valur avant la stagiun auta
En il fratemp arrivan mez december mintg'onn var 50'000 giasts a Lai. Avant 10 onns eran quai anc 10'000. Uschia ha il festival creà ina impurtanta creaziun da valur en la regiun e gida cunzunt als hotels durant il temp difficil avant Nadal a cumenzar pli baud la stagiun d'enviern.
Prix Montagne
Gia dapi 14 onns vegn surdà il Prix Montagne. Dapi quest onn è l’anteriur passlunghist e campiun olimpic Dario Cologna il president da la giuria. Il Prix Montagne sco era il premi dal public vegnan surdads da l'Agid svizzer per la muntogna e la Cuminanza da lavur per ils territoris muntagnards. Dotà è il Prix Montagne cun 40'000 francs, il premi dal public cun 20’000 francs. El vegn surdà a Berna.
