Premiaziun d'ustarias 2025 - Set ustarias cumbattan per pli bella ornaziun da tschaiver

Quest onn èn sa participadas set ustarias a la premiaziun d'ustarias – l'Argo, la Confetti Bar, la Fabrik, l'Imperial Lounge, il Calanda Haldenstein, il Evviva Plankis ed il Mephisto.

Il viadi cumenza a Haldenstein: qua è il tema il cudesch da la dschungla. Il Calanda fetschia part quest onn per l'emprima giada a la concurrenza per la pli bella ornaziun da tschaiver, raquinta il possessur da l'ustaria.

Quest onn èn sa participadas bunamain dubel uschè bleras ustarias sco l'onn passà. L'uniun da tschaiver surdat mintgamai ina plachetta als victurs – uschia era quest onn. La presidenta da l'uniun, Irina Peng, è fitg cuntenta ch'i dat quest onn puspè dapli ustarias.

Da Haldenstein vai vinavant en la Shishabar «Imperial Lounge». En cumparegliaziun cun il restaurant a Haldenstein è questa decoraziun plitost decenta – mo in pèr balluns pendan giu dal palantschieu sura. Il tema èn qua tenor la possessura «ils onns 80 e 90».

Las autras tschintg ustarias sa chattan en la citad veglia da Cuira. Dal bastiment dal capitani Jack Sparrow en la «Fabrik» al Welschdörfli ...

... vai vinavant tar il gieu da video Mario Kart en la bar «Mephisto» ...

... e vinavant en in mund d'intelligenza artificiala, en il «Evviva Plankis» ...

... e tar il Eurovision Song Contest en la «Confetti» bar.

L'ultima fermada è tar l'ustaria «Argo» davos la staziun. Il tema là: la bella Italia. I savura da pizza frestga e l'entira ustaria è ornada cun chandeilas, bandieras da l'Italia e perfin in maletg d'il Papa. Il manader da l'ustaria è vestgì sco mafiosi cun egliers nairs e vestgadira eleganta.

El raquinta cun plaschair ch'el haja decorà l'ustaria cun ils clients da l'Argo – qua na para el gnanc pli sco in mafiosi serius. Suenter che la giuria ha vì tut las ustarias, sesa ella ensemen e dumbra ils puncts. Ils victurs èn clars: l'ARGO, la Confetti Bar ed il Calanda Haldenstein.

Lura turna l'uniun da tschaiver tar ils trais victurs cun la buna nova. Els tuts survegnan ina gronda plachetta per onurar lur creativitad. Surtut a Haldenstein è il plaschair grond – l'emprima giada ch'els han prì part, han els gia gudagnà! Ma era l'ARGO e la Confetti Bar han grond plaschair e celebreschan lur success.