En in’intervista cun las gasettas da Tamedia ha Berset ditg ch’ils custs da sanadad creschian pli ferm che spetgà. Quai gia l’onn passà e cunzunt er quest onn. Mo er l’auter onn quintian las cassas da malsauns cun in ulteriur augment dals custs. Vitiers vegnia che las cassas hajan pers l’onn passà 1,8 milliardas francs als martgads da finanzas. Dapertut giaja en la direcziun fallada, uschia il minister da sanadad partent vinavant.
Avant in’emna ha la directura da Santésuisse, Verena Nold, ditg che las premias da las cassas da malsauns pudessan crescher l’auter onn per 8% fin 9% per ch’ils custs possian vegnir cuverts. Berset n’ha betg vuli commentar questas cifras. Dentant ha el detg ch’i saja impurtant da reducir il squitsch finanzial cun reducziuns individualas da las premias.
La fin dal mais annunzia la Confederaziun per quant bler che las premias da las cassas da malsauns s'augmentan il 2024.
