Il minister da sanadad grischun Peter Peyer fa quitads ch’ils ospitals en il Grischun pudessan vegnir quest'enviern a lur cunfins pervi dal coronavirus. Sch'i dettia l'enviern tants accidents da sportists sco ils ultims onns, vegnia fitg stretg:
La regenza ha sclerì sch'ils ospitals en auters chantuns fissan pronts da surpigliar persunas da lur chantuns che fan accidents sin pistas grischunas. Ma la resposta saja stada dischillusiunanta.
Nus avain constatà ch'ils ospitals èn plains en l'entira Svizra.
Actualmain haja il Grischun anc letgs libers en ils ospitals. Damaun vul la regenza discutar davart ulteriuras mesiras e silsuenter communitgar quellas a la populaziun. Uschè dramatica sco la situaziun saja per il mument en ils ospitals, na saja betg da spetgar ch'i dettia schluccadas da las mesiras. Er dal Cussegl federal na spetgian els betg ch'el decidia venderdi da schluccar mesiras – plitost il cuntrari.
56 novs cas en Grischun
Il Grischun dumbra oz 56 ulteriuras infecziuns. Il mument sa chattan 1'010 persunas en quarantina e 755 en isolaziun. La fin d'emna passada ha il Grischun fatg tests da massa en il sid dal chantun. Là èn 15'151 persunas vegnidas testadas e 150 da quellas èn stadas positivas.
